Национальнай бырайыагынан Дьокуускайга 23 км суол аспаалланна
Бэҕэһээ, алтынньы 28 күнүгэр, СӨ Бырабыыталыстыбатын бэрэссэдээтэлин солбуйааччы Алексей Колодезников видеосибээһинэн «Куттала суох уонна хаачыстыбалаах массыына суоллара» национальнай бырайыагы олоххо киллэрии суһал ыстаабын мунньаҕын ыытта.
«Туһааннаах бырайыагы олоххо киллэрии этэҥҥэ ыытыллан иһэр. Эрэгийиэннээҕи суолларга бэдэрээтчиттэргэ үбүлээһин 77% төлөннө. Дьокуускай куоракка 49% үбүлэннэ. Номнуо суолу аспааллааһын үлэтэ барыта 100% оҥоһулунна», — диэн Алексей Колодезников бэлиэтээн эттэ.
«Куттала суох уонна хаачыстыбалаах массыына суоллара» национальнай бырайыакка 2020 сылга өрөспүүбүлүкэҕэ 4,4 млрд солкуобай көрүллүбүтэ. Ол иһигэр федеральнай бүддьүөттэн 749,9 мөл. солк.
Бырайыак түмүгүнэн 211,09 км эрэгийиэннээҕи суол нуормаҕа эппиэттиир буолуоҕа уонна Дьокуускай куоракка 23,5 км уулуссалар оҥоһуллуохтара.
Массыына суолларын управлениетын генеральнай дириэктэрин солбуйааччы Виктор Игнатьев иһитиннэрбитинэн, өрөспүүбүлүкэтээҕи суолларга 18 эбийиэккэ үлэ түмүктэннэ. Алтынньы 28 күнүнээҕи туругунан бэдэрээтчиттэргэ 3,03 млрд солк. төлөннө. Мантан эрэгийиэннээҕи суолларга 2,42 млрд солк., ол иһигэр федеральнай бүддьүөттэн 151,7 мөл. солк. Дьокуускай куоракка үбүлээһин 49% оҥоһулунна.
Билиҥҥи тургунан 1,92 мөл. кв м аспаалбетон уонна да атын бүрүөһүн матырыйааллар уурулуннулар.
СӨ Бырабыыталыстыбатын уонна Ил Дарханын пресс-сулууспата