Национальнай бибилэтиэкэҕэ хапытаалынай өрөмүөн ыытыллыа.
Ил Дархан Айсен Николаев сорудаҕынан Саха АССР 100 сылынан Национальнай бибилэтиэкэни өрөмүөннүөхтэрэ. Быйыл дьиэ бастакы уонна иккис мэндиэмэннэригэр үлэ ыытыллар. Онтон үһүс, төрдүс мэндиэмэннэргэ салҕанар.
—Хапытаалынай өрөмүөҥҥэ 30 мөл. солк.көрүллүбүт. Ону сэргэ, кинигэни харайан уурарга усулуобуйа тупсарыллара наадатынан, вентиляция өрөмүөнүгэр 10 мөл.солк. Өрөмүөҥҥэ бибилэтиэкэ ититэр ситимэ, түннүктэрэ, ааннара, уотун ситимнэрэ уларытыллыахтара«, — диэн СӨ Национальнай бибилэтиэкэ дириэктэрин бастакы солбуйааччы Василий Борисов иһитиннэрэр. Үлэни ыытарга смета СӨ Тутууга сыананы оҥоруу эрэгийиэннээҕи киинигэр эспэртиисэни ааспытын туһунан иһитинэриигэ этиллэр.
Санатан эттэххэ, 2021 сыллаахха Саха сирэ «Кинигэ уонна ааҕыы территорията» буоларын туһунан бэлиэни тутар үрдүк чиэскэ тиксибитэ. Бу бочуоттаах бэлиэ уонна анал бириис кэнники биэс сыл иһигэр үстэ куонкурус номинаннарын кылгас испииһэгэр киирбит итиэннэ «Саамай ааҕар эрэгийиэн» диэн үрдүк ааты ылбыт эрэ эрэгийиэҥҥэ туттарыллар.
СӨ Национальнай бибилэтиэкэтэ — Арассыыйаҕа Хотугулуу-Илин бөдөҥ бибилэтиэкэлэриттэн биирдэстэрэ буолар. Бибилэтиэкэ пуондатыгар 1,6 мөл. экземпляртан тахса бэчээттэнэн тахсыбыт изданиелар хараллан сыталлар. Уопсайа 50 тыһ.тахса ааҕааччылаах. Бибилэтиэкэ үлэтэ сайдан, кэҥээн иһэр.
Саха АССР Норуодунай хамыһаардарын сэбиэтин киэҥ ыҥырыылаах мунньаҕар Саха Национальнай бибилэтиэкэтин тэрийэр туһунан уураах тахсыаҕыттан, бибилэтиэкэ устуоруйата 1925 сыл балаҕан ыйын 14 күнүттэн саҕаланар.
+1
+1
+1
+1
+1
+1
+1