А.С. Пушкин аатынан Национальнай бибилэтиэкэ бу күннэргэ архыып докумуоннарын арыйарга көҥүлү биэрдэ. Бу уһун өрөбүллэргэ дьиэҕэ хаайтаран олорон, бибилэтиэкэҕэ кыайан барбакка, интэриниэтинэн быһа көрөргө кыах биэрдилэр.
Бибилэтиэкэ саайтыгар регистрацияламмыт киһи урут сабыылаах архыып докумуоннарын көрөр кыахтанна.
Маны арыйарга биэс судургу дьайыыны оҥороҕут:
1. Национальнай бибилиэтиэкэ саайтыгар киирэҕит: nlrs.ru
2. Хаҥас диэки үөһээ “киир” (войти) кунуопканы баттыыгыт.
3. Регистрацияланаҕыт.
4. Электроннай буостаҕытын суруйаҕыт, пароль толкуйдуугут.
5. Электроннай буостаҕа сигэ (ссылка) кэлэр, онно киирэҕит. Бүттэ!
Кинигэ ааптар быраабынан көмүскэммит, күлүүһүнэн бэлиэтэммит буоллаҕына, “Заказать временный доступ” кунуопканы баттыыгыт. Оччоҕо Тус кэбиниэккитигэр 14 хонук устата кинигэни көрүөххүтүн сөп.
Тус кэбиниэти туһанан, ыйытыыга хоруй ылыаххытын, сорох сурунааллар, хаһыат ыстатыйаларын, кинигэлэри, монографиялары, ыйынньыктары сакаастыаххытын сөп.
Киһи төрүччүтүн үөрэтиэн баҕарар буоллаҕына, архыып докумуоннарын киирэн хасыһарыгар бэртээхэй усулуобуйа оҥоһуллубут. Докумуоннары электроннай көрүҥҥэ көһөрүү үлэтэ салҕанар. Билиҥҥи туругунан, 329 докумуону киллэрдилэр, ол уопсай ахсаан аҥаара буолар.
Холобур, 1926-1928 сыллардааҕы “поселенные” уонна “посемейные” испииһэктэр бааллар. Оройуоннарынан, нэһилиэктэринэн тус-туспа сурулла сылдьаллар. Онон түргэнник буларга табыгастаах.
Ангелина Васильева, «Саха сирэ» хаһыат, edersaas.ru