Национальнай бэлиитикэҕэ саҥа бырагыраама оҥоһуллан быйыл тохсунньуттан үлэтин саҕалаата. Биһиэхэ, сүүстэн тахса араас омук олорор регионугар, бу эмиэ биир тыын боппуруоспут буолар.
Аграфена Кузьмина, “Саха сирэ” хаһыат, https://edersaas.ru/
Бу бырагыраама норуоту сомоҕолооһуҥҥа, омук култууратын, историятын, тылын-өһүн, уратытын кэлэр көлүөнэҕэ чөл хаалларарыгар төһүү буолуохтаах. “Бу эйгэ тиэмэтинэн олус чараас уонна уустук буолан, госбырагыраама эмиэ бэйэтэ уратылаах буолла. Араас култууралаах, историялаах, тыллаах-өстөөх, итэҕэллээх норуоту биир ситимҥэ киллэрии бэйэтэ ымпыктаах-чымпыктаах. Онон бу саҥа бырагыраама бу эйгэни биир тиһиккэ тиһиэҕэ. Урукку курдук үбүлээһини тус-туһунан биирдиилээн дьаһалларынан ыспакка, тус сыаллаах, дириҥ тэрээһиннэргэ ыытыахпыт”, — диэн бэлиэтиир норуоттар сыһыаннаһыыларын көрөр федеральнай агентства салайааччыта Игорь Баринов.
Бу докумуон 2012 с. тахсыбыт национальнай бэлиитикэҕэ туһуламмыт стратегияҕа олоҕуран оҥоһулунна. Былырыын ахсынньы 29 күнүгэр РФ бырабыыталыстыбатын анал уурааҕынан бигэргэтиллибитэ. Бырагыраама 2025 с. диэри үлэлиэҕэ. Былаан быһыытынан, аҕыс сыл устата национальнай бэлиитикэҕэ, быһа холуйан, 26 млрд солк. көрүллүөхтээх. Быйыл 2,4 млрд солк. барыахтаах. Бу докумуон аҕыс кыра хос бырагыраамалартан турар.
Саха сиригэр национальнай бэлиитикэ боппуруостарынан Гражданскай уопсастыба институттарын сайыннарыы министиэристибэтэ дьарыктанар.
Аграфена КУЗЬМИНА.