Сүрүн

Национальнай бэчээт күнүнэн судаарыстыба наҕараадаларын туттардылар

Иллэрээ сылтан СӨ Ил Дархана Айсен Николаев ыйааҕынан Саха сиригэр Национальнай бэчээт күнэ бэлиэтэнэр. Бэлиэ күн иитинэн СӨ бырабыыталыстыбатын бэрэссэдээтэлэ Андрей Тарасенко суруналыыстарга судаарыстыбаннай наҕараадалары туттарда.

edersaas.ru

Андрей Тарасенко Национальнай бэчээт күнүнэн эҕэрдэлээн туран: “Саха сирин олохтоохторо өрөспүүбүлүкэ олоҕун-дьаһаҕын, ситиһиилэрин, кыһалҕаларын, экэниэмикэ хайдах сайдарын, аан дойдуга туох буола турарын туһунан уталыппакка күннэтэ саҥа сонуннары ааҕар. Биһиги өрөспүүбүлүкэбит медиа түмсүүтэ сонуну хайдах баарынан тиэрдэринэн, төрөөбүт тыл чөл туруктаах буоларыгар, сайдарыгар көхтөөх гражданскай көрүүлээҕинэн уратылаах. Онон нэһилиэнньэ үрдүк итэҕэлин ылар, биһирэнэр.

Билиҥҥи түргэн тэтимнээх олоххо, суһал иһитиннэриини эрэйэр кэмҥэ эһиги идэҕит ордук суолталанна.

Кэлиҥҥи сылларга бу эйгэҕэ улахан уларыйыылар таҕыстылар. Электроннай масс-медиа тэтимнээхтик сайдар, интэриниэт таһаарыылар кэҥииллэр, судаарыстыбаннай өйөбүл баар буолан национальнай бэчээти, таһаарыылары чөл тутан, улуус сонуну таҕатар сириэстибэлэрин өйөөн, сайыннаран кэллибит”, — диэн бэлиэтээтэ.

Уопсастыба биһирэбилин уонна өрөспүүбүлүкэ үтүө аатын ааттатыыга Саха АССР төрүттэммитэ 100 сылыгар аналлаах документальнай киинэ циклын иһин, суруналыыстыка эйгэтигэр В.В. Никифоров – Күлүмнүүр аатынан СӨ Судаарыстыбаннай бириэмийэтинэн Национальнай бибилэтиэкэ медиа киинин кылаабынай режиссера Иван Кривогорницын наҕараадаланна.

Тэлэбиидэнньэ, араадьыйа суруналыыстыкатын эйгэтигэр Н.А. Кондаков аатынан Ил Дархан бириэмийэтин “Алмаастаах кыраай” медиа хампаанньа айар бөлөҕүн генеральнай продюсера Александр Шершуков, таҥааччы режиссера Евгений Кравченко, оҕо литэрэтиирэтин эйгэтигэр А.Е. Мординов – Амма Аччыгыйын аатынан Ил Дархан бириэмийэтин ХИФУ мэдиссиинэҕэ институтун дассыана, СӨ бибилэтиэкэлэрин “Бары ааҕабыт” бырайыактарын амбассадора Лидия Тарасова, Ил Дархан кыраамататын “Саха” НКИХ “Хотугу сулус” телерадиоакадемия сулууспатын начаалынньыга Татьяна Гоголева, “Кэскил” оҕо кыһатын дириэктэрэ Ольга Семенова ыллылар.

“Гражданскай килбиэн” ураты бэлиэни “Сахамедиа” өрөспүүбүлүкэтээҕи холдинг СИА (ЯСИА) эрэдээксийэтин координатора Оксана Ноева туттарда.

“Саха АССР 100 сыла” СӨ үбүлүөйдээх бэлиэтинэн “Айар” кыһа таҥааччыта Анна Гоголева, “Кэскил” оҕо кыһатын бэтэрээнэ Варвара Угарова, СӨ Бырабыыталыстыбатын бэрэссэдээтэлин махтал суругунан “Кэскил” оҕо кыһатын кэлэктиибэ, Ю.А. Гагарин аатынан өрөспүүбүлүкэтээҕи типография генеральнай дириэктэрэ Владимир Сыромятников, “Сахамедиа” холдинг “Саха сирэ” хаһыатын кэрэспэдьиэнэ Людмила Попова бэлиэтэннилэр.

 

“Саха сирэ” хаһыат, edersaas.ru

Андрей СОРОКИН (СИА) хаартыскаҕа түһэриилэрэ.

 

1
0
Telegram Whatsapp