Соторутааҕыта, муус устар 11 күнүгэр, Дьокуускай куоракка «Үргэл» арт-галереяҕа Мэдиссиинэ национальнай киинин үрдүк категориялаах кардиолог-бырааһа Наталья Силина филолог Раиса Попованы кытары «Сааскы кэпсэтии» диэн холбоһуктаах быыстапкалара буолбута.
Арассыыйа үтүөлээх худуоһунньуга, Саха сирин норуодунай худуоһунньуга Юрий Спиридонов живописец, быраас үлэлэрин үрдүктүк сыаналаабыта. Манна даҕатан эттэххэ, Юрий Васильевич өссө 2018 сыллаахха быраас идэлээх киһи уруһуйдьут талаанын таба көрөн, Наталья Силинаны уһуйан барбыта. Оҕо эрдэҕиттэн бэйэтэ живопиһынан дьарыктана сылдьыбыт таланнаах үөрэнээччитэ быыстапкаҕа живописка уонна графикаҕа 17 үлэтин туруорбута.
Кырдьыга да, быйылгы сыл Наталья Николаевнаҕа «сулустаах» сылынан буолла. Бүгүн Сүрэх-тымыр саҥа киинэ аһыллар үөрүүлээх күнүгэр киниэхэ «РФ доруобуйа харыстабылын туйгуна» аат иҥэрилиннэ.
Ол туһунан Наталья Силина:
«Биһиги саҥа Кииммит -– олус кыраһыабай, киэҥ-куоҥ, өрөспүүбүлүкэбит киэн туттуута! Саҥа дьиэбит аһылларын өр күүппүппүт. Бүгүн биир идэлээхтэрбин РФ Доруобуйаҕа харыстабылын министиэристибэтиттэн, СӨ Бырабыыталыстыбатыттан, тапталлаах куораппытыттан кэлэн эҕэрдэлээбиттэрэ олус долгутуулаах.
РФ доруобуйа харыстабылын миниистирэ доруобуйа харыстабылын эйгэтигэр өр сылларга үлэлээбит биир идэлээхтэрбэр эппиэтинэстээх уонна долгутуулаах түгэҥҥэ туһааннаах наҕараадалары туттарбыта үөрдэр.
Биһиги Кииммитигэр кардиология, кардиохирургия, тымыр хирургиятын бастыҥтан бастыҥ быраастара үлэлиэхтэрэ. Сотору кэминэн суһал кардиология отделениета аһыллыаҕа (сэбиэдиссэйинэн үлэлиэхтээх-ааптар). Бүгүҥҥү ылбыт наҕараадам -– бырааска биир саамай үрдүк чиэс. Ону РФ доруобуйаҕа харыстабылын миниистирэ Михаил Альбертович илиититтэн ылбытым өссө ордук долгутуулаах.
Сахабыт сирин бары олохтоохторун өрөспүүбүлүкэбит биир кэрэ-бэлиэ күнүнэн эҕэрдэлиибин!» — диэн үөрүүтүн үллэһиннэ.
Надежда ЕГОРОВА, «Саха сирэ» хаһыат, edersaas.ru
Мария ВАСИЛЬЕВА (СИА) түһэриитэ