Бу күннэргэ Ярославль куоракка ыытыллыбыт полумарафоҥҥа дойду чөмпүйэнээтин мэтээллэрэ оонньоннулар. Үгэс буолбут куоталаһыыга 24 регионтан 57 сүүрүүк илин-кэлин түһүстэ. Манна саха быһый кыыһа Наталья Леонтьева кыттан, 21 биэрэстэ 97,5 м сири 1чаас 14 мүнүүтэ 48 сөкүүндэнэн түмүктээн, бэһис көрдөрүүлэннэ.
Дьахталларга биэтэккэ бастакынан 2008, 2012 сыллардааҕы Олимпийскай оонньуулар призердара Татьяна Архипова кэллэ. Кини бириэмэтэ — 1:11:23. Бу трасса саҥа рекодунан буолар. Ирина Сергеева – иккис (1:11:35), Мария Осокина үһүс (1:13:34) бириистээх миэстэлэргэ таҕыстылар.
Наталья инстаграмҥа бу дистанцияҕа бастакытын холоммутун, төһө да 28 кыраадыс итии күн турдар, үчүгэй бириэмэни көрдөрбүтүттэн астыммытын, ыам ыйыттан саҕалаан балаҕан ыйыгар диэри элбэх күрэхтэһиигэ кыттыбытын, мантан антах дойдутугар сынньана барыаҕын туһунан суруйда.
Ярославллааҕы полумарафоҥҥа барыта алта тыһыынчаттан тахса сүүрүүнү таптааччы кытынна. Оҕолор 300 уонна 600 миэтэрэҕэ сырыстылар. Улахан дьон үс биэрэстэҕэ, биир көскө уонна полумарафоҥҥа күрэстэстилэр.
Роман Попов
Хаартыска Интэриниэттэн ылылынна.