Бүгүн Дьокуускай куорат клиническэй балыыһатын инфекционнай салаатын саамай эдэр инфекционист бырааһын Наталья Ильинаны кытта кэпсэттим.
Маҥан халааттаах аанньаллар маннык ыгым уонна суһал кэмҥэ дьиэлэриттэн тэйэн, түүннэри-күнүстэри симиэнэнэн үлэлииллэр. 25 саастаах быраас Наталья үлэтин туһунан маннык кэпсиир:
— Биһиги инфекционнай салаабытыгар 55 үлэһит түүннэри-күнүстэри үлэлиир. Быраастар, сиэстэрэлэр, санитардар, тиэхиньиичэскэй үлэһиттэр баарбыт. Үлэһиттэр бары дьиэбититтэн тэйэн, гостиницаҕа олоробут. Үлэбитигэр илдьэллэр-аҕалаллар.
Аан бастаан бу коронавирус дьаҥа аан дойдуга тарҕанаатын, ыарыы пандемиятын биллэрээттэрин кытта биһигини, быраастары, респиратордаах үлэлииргэ, салгын киирбэт таҥаһын таҥнарга үөрэтэн саҕалаабыттара.
Кулун тутар бүтүүтэ биһиги салаабытыгар дьаҥҥа хаптарбыт бастакы киһи киирбитэ. Быраастар, үлэһиттэр бары бэрчээккэлээх, мааскалаах, анал таҥастаах үлэбитин саҕалаабыппыт.
Ыарыһах үтүөрэн тахсаатын кытта бэйэлэрин поликлиникаларын терапевт быраастарыгар биллэрэбит. Бу дьон булгуччу дьиэҕэ хааччахтанан олорууну тутуһуохтаахтар. Балыыһаҕа сытааччыларбытын түүннэри-күнүстэри кэтээн көрөбүт.
Убаастабыллаах олохтоохтор, баһаалыста, хааччахтанан олорууну тутуһуҥ. Эһиги тускутугар биһиги дьоммутуттан тэйэн симиэнэнэн үлэлии сылдьабыт. Кырачаан кыысчааным миигин ахтан, түннүгү маныыр үһү. Дьаҥ этэҥҥэ аастар, чугас дьоммутун кытта бииргэ буолуо этибит.
Ульяна Захарова, edersaas.ru