Саха норуодунай поэта Наталья Харлампьева “Азия Хотун” поэтическай хомуурунньуга Лондоҥҥа Hertfordshire Press (SRM Group) издательствоҕа английскайдыы тылынан бэчээттэнэн тахсыбытын, бу кинигэ күн сирин көрүүтэ – саха литературатын историятыгар аан бастаан Лондоҥҥа английскайдыы тылынан бэчээттэнии чаҕылхай чахчытынан буолбутун биһиги ааҕааччыларбытыгар иһитиннэрбиппит.
Онон, билигин ангийскай тыллаах икки миллиартан тахса ааҕааччы саха омугун – бу саамай хоту олорор түүр норуотун, кини култууратын, үгэстэрин билсэр кыахтанна.
Санатан эттэххэ, Британияҕа хаһыс да сылын ыытыллар “Открытая Евразия” норуоттар икки ардыларынааҕы литетурнай куонкуруска былырыын, 2015 сыллаахха, “Лучшая женская работа” номинацияҕа саха народнай поэта Наталья Харлампьева кыайыылааҕынан тахсыбыта уонна Марзия Закирьянова аатынан бириэмийэнэн наҕараадаланан, Лондоҥҥа Hertfordshire Press (SRM Group) издательствоҕа английскайдыы тылынан бэчээттэнэр быраабы ылбыта.
Оттон бу олох аҕыйах хонуктааҕыта Лондоҥҥа Наталья Харлампьева “Азия Хотун” кинигэтин сүрэхтэниилэрэ буолла. Тэрээһин Евразия айар гильдиятын көҕүлээһининэн аһаҕас Евразийскай кинигэ форумун уонна литературнай фестиваль чэрчилэринэн ыытылынна.
Бастакы презентация “Россотрудничество”-ҕа, иккис – Эмре Юнус турецкай култуура киинигэр буоллулар. Кинигэ сүрэхтэниилэрэ Н.Харлампьева тылларыгар ырыаһыт Лэгэнтэй “Азия” диэн клибинэн саҕаланнылар.
“Азия Хотун” кинигэ сүрэхтэниилэригэр тылбаасчыт, кинигэ литературнай эрэдээктэрэ Дэвид Пэрри, рецензент Солви Фаннар, Евразийскай кинигэ форумун сүрүн тэрийээччилэриттэн биирдэстэрэ Марк Ахмеджанов, саха олоҥхотун английскай тылга тылбаастыырга литературнай эрэдээктэринэн буолбут Светлана Егорова-Джонстон, уо.д.а. кыттыыны ыллылар, саха поэтессатын айар үлэтигэр үрдүк сыанабылы биэрдилэр.
Татьяна МАРКОВА.