Наталья Харлампьева: «Ил Дархан история туһунан эппитин суруйааччыларга быһаччы сорук курдук ылынным»
Саха народнай поэта, Саха сирин суруйааччыларын сойууһун бэрэссэдээтэлэ Наталья Харлампьева Ил Дархан Анал этиитигэр сыһыаран, эдэр дьон историяны ытыктыырыгар, билэригэр литература улахан суолталааҕын бэлиэтээтэ.
– Дьиҥэр ыллахха, быйыл өрөспүүбүлүкэбит сүрдээх ыарахан сылы түмүктээн эрэр. Бу сайыҥҥы курдук тирээн турар кыһалҕалар, ыарыы, дьаҥ-дьаһах, ойуур баһаардара барыта, күн аайы саҥа быһаарыныылары, дьаһаллары түргэнник ылыныыны Ил Дархантан ирдээбиттэрэ. Ону кини чиэстээхтик толорбутун, уйуммутун, барытыгар инники күөҥҥэ сылдьыбытын хайаан да бэлиэтиир наада дии саныыбын. Бүгүн бу мунньахха кэлэн олорор геройдары кытта биир эрээккэ Ил Дархаммытын туруорар сөп.
Айсен Сергеевич Анал этиитигэр тыа хаһаайыстыбатыгар санааларын эттэ. Тыа сиригэр үөскээбит киһи, сүөһү ииттэр дьоҥҥо кэлэр сылтан өйөбүл лаппа үрдүөҕүн туһунан эппитин бэркэ сэргии иһиттим. Быйылгы 35 тыһыынча солкуобай улахан өйөбүл этэ. Тыа сиригэр гаастааһын киириитэ, манна улахан хампаанньалары кытары үлэлэһии – бу эмиэ дьон-сэргэ олоҕун тупсарыыга туһуламмыт, урукку сылларга соччо кыайтарбатах дьыала.
Историяны токурутуу уонна патриотизмы күүһүрдүү боппуруостарыгар Ил Дархан этиитин суруйааччыларга быһаччы сорук курдук ылынным. Ити биһигини олус долгутар тиэмэ. Ыччат историятын ытыктыырыгар, билэригэр литература улахан оруоллаах.
Ийэ, эбээ буоларым быһыытынан, кэлэр сыл Ийэ сылынан биллэриллибитин олус долгуйа иһиттим. Ити өрөспүүбүлүкэ үбүлүөйдээх сылыгар олус сөптөөх уонна кэскиллээх быһаарыныы дии саныыбын. Ааспыты, бүгүҥҥүнү, сарсыҥҥыны барытын ийэ ситимниир, ийэ сүрэҕэ алгыстаах! Онон силистээх мутуктаах, сахалыы толкуйдаах санаа этилиннэ диэн тус бэйэм сыаналыыбын, – диэн бэлиэтиир Наталья Ивановна.
Аграфена КУЗЬМИНА