Кэлэр көлүөнэ оҕолорун кытары тиһигин быспакка көрсүһүү – наркология өрөспүүбүлүкэтээҕи диспансерын сэрэтэр үлэҕэ сүрүн хайысхаларыттан биирдэстэрэ.
Маннык көрсүһүүлэр кэмнэригэр психиатр уонна нарколог быраастар оҕолорго, ыччаттарга арыгы, наркотик уо.д.а. буортулаах дьаллыктар буортуларын туһунан сиһилии кэпсииллэр. Ол эбэтэр, чөл олох уратыларыгар, үтүө өрүттэригэр кинилэр болҕомтолорун тардаллар.
Ол да иһин, нарколог-быраастар үөрэх дьылын кэмигэр үөрэх тэрилтэлэригэр, онтон сайыҥҥы кэмҥэ доруобуйаны чэбдигирдэр итиэннэ оскуола иһинэн тэриллэр лааҕырдарга ыалдьыттыыллар. Оҕолор үксүгэр эмчиттэр лиэксийэлэрин, видеоматырыйааллары, мультимедийнай лиэксийэлэри олус сэргииллэр, листовкалары уонна буклеттары сыныйан ааҕаллар.
Маннык бэсиэдэлэр сүрүн уратыларынан уонна ордуктарынан исписэлиистэри кытары атах тэпсэн олорон аһаҕастык сэһэргэһии буолар. Оҕолор кинилэргэ ханнык баҕарар интэриэһиргиир боппуруостарын биэриэхтэрин уонна тута эппиэти ылыахтарын сөп.
Наркология диспансерын исписэлиистэрин доруобуйаны чэбдигирдэр лааҕырдар иитиллээччилэрин кытары көрсүһүүлэрэ сыл аайы тэриллэр. Диспансер исписэлиистэрэ быйыл сайын номнуо «Каландрашвили», «Радуга», «Спутник», «Родничок», «Бинго» лааҕырдарга кэлбиттэригэр барыта 700-чэ киһи сырытта.
«Оҕолор арыгы, наркотик буортутун туһунан элбэҕи билэллэрэ уонна кэпсэтиигэ көхтөөхтүк кытталлара үөрдэр. Кинилэр бэйэлэрин билиилэрин үллэстээри былдьаһа-былдьаһа кытталлар. Онон, оҕолор сайыҥҥы сынньалаҥнарын кэмнэригэр билиилэрин чиҥэтиэххэ уонна болҕомто таһыгар хаалларыа суохха наада. Биһиги биир идэлээхтэрбитин кытары лааҕыр бары сезонугар кэлиэхпит уонна оҕолорго чөл олох олоҕу уһатарын, куһаҕан дьаллыктар буортуларын кэпсиэхпит”, — диэн наркология өрөспүүбүлүкэтээҕи диспансерын психиатр-нарколога Алена Владимировна Константинова иһитиннэрдэ.
Надежда ЕГОРОВА, “Саха сирэ”, edersaas.ru