Наркология диспансерыгар ыспыраапка ыларга уочарат тоҕо үөскээтэ?

Бөлөххө киир:

Наркология өрөспүүбүлүкэтээҕи диспансерын наркологтарыттан уонна психиатрдарыттан ыспыраапка ыларга уочарат үөскээбитэ номнуо биир нэдиэлэ буолла. Суоппар быраабын уларыттарарга, саа сэбин ыларга уо.д.а. ыспыраапкаларга тоҕо маннык уочараттаах буолла?

РФ Доруобуйа харыстабылыгар министиэристибэтин 2021 сыл сэтинньи 30 күнүнээҕи бирикээһинэн, 2022 сыл кулун тутар 1 күнүттэн саа сэбин туттарга көҥүлү уонна суоппар дастабырыанньатын ыларга мэдиссиинискэй хамыыһыйаны барыы быраабылалара уларыйдылар.

Уочарат тоҕо элбиирин исписэлиистэр маннык быһаардылар:

— Ол сиэринэн, саа сэбин туттарга көҥүлү билигин олорор сиргинэн судаарыстыбаннай эбэтэр муниципальнай мэдиссиинискэй тэрилтэлэр эрэ биэрэр буоллулар. Мэдиссиинискэй туоһулааһын (освидельствование) туһунан иһитиннэрии сааҕа, карабиҥҥа уонна травматическай бистэлиэттэргэ көҥүлү биэрэр Росгвардия биир кэлим реестригэр киллэриллэр. Билигин, чуолаан суол алдьаныан уонна булт көҥүлэ саҕаланыан иннинэ Наркология диспансерыгар өрөспүүбүлүкэттэн барытыттан кэлэллэр.

– Саҥа быраабылаларынан, наркологтары, бастатан туран, саа сэбин туттарга мэдиссиинискэй көрдөрүүгэ сөп түбэспэт көстүүлэр бааллара-суохтара интэриэһиргэтэр. Мэдиссиинискэй туоһулааһыҥҥа химико-токсикологическай чинчийиини сэргэ организмҥа наркотическай уонна психоактивнай биэсэстибэлэри бэрэбиэркэлээһин, килиниичэскэй психологтар тиэстэрэ киирэллэр. Манна барытыгар ортотунан биир киһиэхэ 30-40 мүнүүтэ барар.

– Суоппар быраабыгар мэдиссиинискэй көрүүнү ыытар быраастар билигин арыгыны уонна наркотигы туһаныыга уорбаланар дьону уонна суоппардыырыгар сөбө суох ыарыылары булар, билинэр бырааптаахтар. Итинник дьону уонна массыынаны итирик туруктаах ыыта сылдьан бырааптарыттан быһыллыбыт эбэтэр мэдиссиинискэй туоһулааһынтан аккаастаммыт дьону наркотиктан тутулуктаныыны эбэтэр хроническай арыгылааһыны быһаарар химико-токсикологическай чинчийиигэ ыыталлар. Онон, мэдиссиинискэй чинчийии бириэмэтэ эмиэ уһаан биэрдэ -– биир чаастан ордук бириэмэни ылар.

– Өрөспүүбүлүкэ үгүс оройуоннарыгар килиниичэскэй психологтар суохтар. Онон, нэһилиэнньэ тоҕо анньан кэлэр.

– Киһи организмыгар психо-актыыбынай биэсэстибэлэри быһаарар химико-токсикологическай лаборатория өрөспүүбүлүкэҕэ Наркология өрөспүүбүлүкэтээҕи диспансерыгар (Автодорожнай уул. 38) эрэ баарын нэһилиэнньэ учуоттууон наада. Чинчийэр тэрил олус улахан сыаналаах буолан, билиҥҥитэ оройуоннарга ити кыаллыбат.

— Билигин саҥа ыспыраапкаҕа быраастар уонна чинчийиилэр түмүктэрэ барыта киирэллэрэ олус улахан суолталаах.
Саа сэбин туттарга уонна массыынаны ыытарга 2022 сыл кулун тутар 1 күнүгэр диэри бэриллибит ыспыраапка болдьоҕо -– биир сыл.

Мэдиссиинискэй хамыыһыйалар үлэлииллэр:

Автодорожнай уул. 38 – 3 нарколог, 2 психиатр, 4 килиниичэскэй психолог, мэдиссиинискэй сиэстэрэлэр;
  Стадухин уул. 81 (Спид Киин) – 1 нарколог;
Киров уул. 21 – 2 нарколог-быраас.
Нэһилиэнньэҕэ табыгастаах буоларын туһугар сорох исписэлиистэр, ол иһигэр орто мэдиссиинискэй үлэһиттэр, уоппускаларыттан ыҥырылыннылар.
Наркология өрөспүүбүлүкэтээҕи диспансерыгар уочараты үөскэппэт туһугар атын дьаһаллар эмиэ ылылыннылар.
Ол курдук, Автодорожнай уулусса 38 нүөмэрдээх дьиэтигэр профосмотр отделениетыгар нэһилиэнньэни көрөр бириэмэ уһаан биэрдэ. Саҥа графигынан манна 8.30 чаастан 18.00 ч. диэри, субуотаҕа – 9.00 чаастан 16.00 ч. диэри үлэлииллэр (массыынаны ыытарга, саа сэбин туһанарга, ЧОП үлэһиттэригэр, омук гражданнарыгар ыспыраапкалар).
Киров уул. 21 — 8.00 чаастан 15.00 ч. диэри (массыынаны ыытарга, саа сэбин туһанарга, үлэҕэ ылылларга, эпиэкэ уорганнарыгар ыспыраапкалар).
Стадухин уул. 81 — 8.30 чаастан 15.45 ч. диэри (массыынаны ыытарга, омук гражданнарыгар ыспыраапкалар).
Мэдиссиинискэй чинчийиилэргэ психиатр-быраас  Орджоникидзе уул. 33, 8.00 чаастан 15:00 ч. диэри көрөр.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0