Нам улууһун олохтоохторо FM 104,3 диапазоҥҥа «Энсиэли» араадьыйа биэриитин истэр буоллулар. Бу туһунан СИА суруйаллар. «Эҥсиэли» радиостанция холбонуутун бигэргэтэр кунуопканы улуус баһылыга Юрий Слепцов, «Телевидениенэн уонна араадьыйанан биэрии техническэй киинэ» ГУТ генеральнай дириэктэрэ Андрей Ребров уонна ыстаансыйаны салайар Гаврил Мальцев холбообуттар.
«ТЦТР Якутии» ГУТ кэпсээбиттэринэн, араадьыйанан биэриилэри тиэрдэр ыстаансыйаны сэргэ, араадьыйа устуудьуйалаах түргэн тэтимнээх интэриниэт-канал Аппааныга үлэлиир. Генеральнай дириэктэр Андрей Ребров муниципалитеттары кытары үлэлэһэргэ бэлэмин иһитиннэрбит. Улууска араадьыйаланарга өссө икки сыллааҕыта туруммуттар. Бу кэм устатыгар араас боппуруостар быһаарыллыбыттар, лицензия ылыллыбыт.
«Энсиэли» араадьыйанан биэрии улууска бары хайысханы хабар — улуус сонуна, интэриэһинэй дьону кытары кэпсэтии, суһал биллэриилэр, музыка, ону сэргэ, олохтоох мелодистар ырыалара иһиллиэҕэ.
Нам улууһун баһылыга Юрий Слепцов «ТЦТР» ГУТ кэлэктиибигэр өйөбүллэрин иһин махталын биллэрдэ. «Биһиги улуус ыраах нэһилиэктэригэр үрдүк хаачыстыбалаах араадьыйанан биэриилэри киллэрэргэ үлэлэһэбит. Маныаха биһиги бу тэрилтэ спутниковай, оптоволоконнай тиһиги киллэриигэ үгүс сыллаах уопуттарыгар, үлэҕэ үөрүйэхтэригэр эрэнэбит», — диэтэ.
Инновация, цифровой сайдыы уонна инфокоммуникационнай технология миниистирин солбуйааччы Чокуур Гаврильев, бу улууска улахан бэлиэ түгэнинэн буоларын ыйда. «Эҥсиэли» радионан биэриини улуус олохтоохторо сэргиэхтэрэ, биһириэхтэрэ диэн эрэнэбин. Радиобиэриигэ профессионаллар үлэлииллэр. Кинилэр араас көлүөнэ дьонугар-сэргэтигэр интэриэһинэй, сэргэх биэриилэри оҥоруохтаахтар. Маннык инициатива миэстэтигэр өйөбүлү ылыахтаах уонна олоххо киллэриллиэхтээх», — диэтэ.
СИА