Нам улууһун дьахталлара ханнык баҕарар уустук түгэҥҥэ биир дойдулаахтарыгар өрүү өйөбүл буолаллар.
edersaas.ru
Соторутааҕыта улуустааҕы Дьахтар сэбиэтэ Нам улууһун Модут нэһилиэгин элбэх оҕолоох ыалларыгар Алквиад уонна Дарья Протодьяконовтарга аһымал аахсыйа тэрийэн, өйөбүл оҥордулар. Бу туһунан Дьахтар сэбиэтин салайааччыта Ирина Находкина кэпсиир:
— Протодьяконовтар дьиэлэрэ баһаартан эмсэҕэлээбитигэр ыҥырыыбытын ылынан, улуус дьахталларын түмсүүлэрин амарах санаалаах кэрэ аҥаардара ыыппыт көмө харчыларын, аһынан-таҥаһынан өйөбүллэрин тустаахтарга илдьэн туттардыбыт. Улуустааҕы дьаһалта дьиэ кэргэн отделын салайааччыта Мария Винокурованы, Модут нэһилиэгинээҕи дьахтар сэбиэтин салайааччыта Татьяна Сивцеваны кытта Протодьяконовтары дьиэлэригэр тиийэн көрүстүбүт. Кинилэр олбуордарыгар сахалыы балаҕан туттан саҕалаабыттар. Саҥа дьиэ туттар былааннаахтар. Атырдьах ыйыгар улуус аатыттан «Тыа сирин ыала-2020» өрөспүүбүлүкэтээҕи күрэскэ кыттаары сайаапкаларын бэлэмнии сылдьаллар. Бу күннэргэ окко сылдьаллар. Онон дьоммут санаалара бөҕөх. «Бар дьоммут көмөлөһөн, махталбыт муҥура суох», диэн үөрүүлэрин үллэстэллэр.
Кырдьык, ыарахан түбэлтэҕэ түбэспит дьон, биир дойдулаахтарын өйөбүлүнэн санаалара бөҕөх буолан, кэскиллээх былааннаах буоллахтара.
Елена ПОТОЦКАЯ, «Саха сирэ» хаһыат, edersaas.ru
Хаартыска — Ирина Находкина тиксэриитэ.