Ойуунускай тыл эппит тырыбынатын саҥардан оҥоруохтара

Бөлөххө киир:

Өрөспүүблүкэбит оскуолаларын 1990 сыллаахха бүтэрбиттэр Ил Дархан Айсен Николаев көҕүлээһининэн саҕаламмыт «Пааматынньыктары харыстыаҕыҥ» бырайыакка көхтөөхтүк ылыстылар. Кинилэр Нам сиригэр 1937 сыллаахха П.А. Ойуунускай тыл эппит тырыбыната устуоруйа кэрэһитэ быһыытынан хараллан турарын саҥардарга сананнылар.

Түмсүү актыыба бэҕэһээ Нам улууһугар тиийэн пааматынньыгы көрдө-иһиттэ уонна үс өттүлээх сөбүлэһии түһэристэ. Маныаха Нам улууһун дьаһалтата (баһылык Юрий Слепцов) уонна СӨ Култуурунай наследиетын эбийиэктэрин харыстабылын департамена (салайааччы Николай Макаров) кыттыыны ыллылар.

Тэрээһин үлэтин туһунан 1990 сыллаахха Саха сирин оскуолаларын бүтэрбиттэр түмсүүлэрин актыыбын бэрэссэдээтэлэ Алексей Петров кэпсиир:

— Дьиҥэ, бу бырайыакка ылсыы туһунан санаа кыһын кэлбитэ. Маныаха коронавирус пандемията мэһэйдээн, былааммыт уһаан-кэҥээн хаалбыта. Бэҕэһээ, балаҕан ыйын 3 күнүгэр, Намҥа баран пааматынньыкпытын көрөн-истэн, сөбүлэһии түһэрсэн кэллибит. Саха АССР тэриллибитэ 100 сылын көрсө чулуу убайдарбыт сырдык ааттарын үйэтитиэхпит. САССР тэриллибитэ 15 сылыгар Намҥа Олоҥхо ыһыаҕа буолбут. Онно Былатыан Ойуунускай кэлэн тыл эппит тырыбынатын саҥардарга сананныбыт. Олус элбэх ирдэбил баар эбит, лицензия наада. Онон билиҥҥитэ пааматынньыкпыт хайдах буоларын түстүүр бырайыак оҥоһулла сылдьар. Бырайыак бүттэ даҕаны, үлэбитин саҕалыыбыт.

Түмсүүбүт былырыын тэриллибитэ. Сонун санаалаах, көҕүлүүр күүстээх дьонтон турар актыыптаахпыт. Өссө даҕаны ураты идиэйэлэр бааллар, ырытыһа сылдьабыт. Батсаапка улахан бөлөхтөөхпүт, онно уопсай сүбэнэн быһаарыныылары ылынабыт. Утарар да дьон баар буоллаҕа дии, ол эрээри, мин санаабар, хас биирдии киһи иһигэр үтүө санаа син биир баар.

Үүнэр көлүөнэҕэ холобур буолар сыаллаах бырайыакпыт өрөспүүбүлүкэ оскуолаларын 1990 сыллааха бүтэрбиттэр харчыларынан олоххо киириэҕэ.


Өрөспүүбүлүкэ оскуолаларын 1990 сыллаахха бүтэрбиттэр быйыл 30 сылларын бэлиэтииллэр. Онуоха үҥкүүнэн-ырыанан эрэ муҥурдаммакка, быйыл биллэриллибит Дойдуга бэриниилээх буолуу сылыгар анаан уонна эдэрдэргэ холобур буолар туһуттан уопсай дьыала тула түмсүбүттэрэ кэрэхсэбиллээх.

Айтана Аммосова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0