Өрөспүүбүлүкэҕэ Үрүҥ көмүс волонтердар хамсааһыннара Дойдуга бэриниилээх буолуу сылыгар араас хайысхалаах үлэни ыытар.
edersaas.ru
Нам улууһун киинигэр волонтердар Ленскэй нэһилиэгин дьаһалтатын кытта ыкса сибээстээхтик үлэлииллэр.
Бу туһунан улуустааҕы Үрүҥ көмүс волонтердар уопсастыбаннай тэрилтэлэрин салайааччыта Клавдия Сивцева билиһиннэрэр:
— Хас түөлбэ аайыттан соҕотох олорор ийэлэртэн, бэтэрээннэртэн ыйыталаһан, мууска наадыйар дьоммут испииһэгин оҥорон, Ленскэй нэһилиэгин дьаһалтатын ыччаты кытта үлэлиир лиидэр Айаал Афанасьевка биэрбиппит. Ол испииһэк быһыытынан ыччаттар, олохтоох аҕалар сэбиэттэрэ, Ис дьыала улуустааҕы отделын үлэһиттэрэ бүгүн, кулун тутар 7 күнүгэр, Дьахтар күнүн көрсө босхо 5 ыалы мууһунан хааччыйдылар.
Дьахтар күнүгэр муус бэлэхтэппит ыаллар ийэлэрэ махталлара муҥура суох. Мантан инньэ халлаан сылыйан, Үрүҥ көмүс волонтердар уонна нэһилиэк ыччаттара Ленскэй нэһилиэгин кырдьаҕастарыгар өссө да араас өйөбүлү уонна көмөнү оҥорор былааннаахтар. Бу күннэргэ бэтэрээннэртэн туох көмөҕө наадыйалларыгар сайаапка хомулла сылдьар. Маннык үлэлэргэ аны оскуола оҕолорун кытыннарар санаалаахпыт.
Мантан саас ытык кырдьаҕастарбытыгар көмө наадата чахчы. Кыстыыр мастарын киллэрии, хайытыы, саһааннааһын, хаар күрдьүүтэ. Онон Нам улууһун волонтердарын холобурун өрөспүүбүлүкэ бары нэһилиэктэрин олохтоохторо батыһаллара буоллар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Клавдия Сивцева түһэриитэ.