Өрөспүүбүлүкэҕэ биллэриллибит Чэбдигирии сылын чэрчитинэн И.Е.Винокуров аатынан Намнааҕы педагогическай кэллиэс салалтата, устудьуоннар сэбиэттэрин кыттыылаахтара уонна «БИНИНС» педагогическай этэрээт көҕүлээн, «Доруобай буол» диэн аһымал аахсыйаны тэрийдилэр.
Аахсыйаҕа устудьуоннар, кэллиэс үлэһиттэрэ оҕолорго аналлаах тус гигиена тээбириннэрин, кэнсэлээрийэ малларын, оонньуурдары көмө быһыытынан хомуйдулар. Бу аахсыйа Нам оройуонун киин балыыһатыгар педиатрияҕа сытар араас кыһалҕаҕа түбэспит оҕолорго көмө быһыытынан ыытылынна.
Намнааҕы киин балыыһа кэлэктиибэ амарах санаа аахсыйатын ыыппыт И.Е.Винокуров аатынан Намнааҕы педагогическай кэллиэс салалтатыгар, устудьуоннарга, үлэһиттэргэ, дириэктэргэ Елена Вячеславовна Никитинаҕа махталын биллэрдэ. Олох араас уустуктарыгар түбэспит оҕо барахсаҥҥа кыра даҕаны наада — маннык ис сүрэхтэн оҥоһуллар амарах санаалаах аһымал аахсыйалар үтүөнү үксэтэ, үөрүүнү элбэтэ турдунар.