Нам улууһунааҕы дьахтар сэбиэтин инстаграмыгар Мария Габышева ыалдьыттаата
Быйыл Саха сирин дьахталларын уопсастыбаннай тэрилтэлэрин сойууһа улуустардааҕы дьахталлар сэбиэттэрин цифровой ситимҥэ холбооһуҥҥа бырайыагынан Ил Дархан граныгар кыайбыта.
Бу күннэргэ улуустардааҕы дьахталлар сэбиэттэрэ бэйэлэрин инстаграмнарыгар араас интэриэһинэй тэрээһиннэри ыыталларын туһунан иһитиннэрэллэр.
Ол курдук, бүгүҥҥүттэн Нам улууһунааҕы дьахтар сэбиэтэ буолаары турар Саха сирин дьахталларын 15 сийиэһин уонна Уһук Илиҥҥэ дьахталлар 2-с пуорумнарын көрсө «Нам улууһугар дьахтар хамсааһынын үс көлүөнэтэ» диэн биэриини бэлэмнээн таһаарда. Биэрии бастакы ыалдьытынан Нам улууһугар дьахталлар сэбиэттэрин үлэтигэр улахан оруоллаах СӨ норуотун хаһаайыстыбатын үтүөлээх үлэһитэ, «Аҕа дойдуга үтүөлэрин иһин» 2-с степеннээх уордьан кавалера, СӨ «Гражданскай килбиэн» бочуоттаах бэлиэ кавалера Мария Габышева буолла.
Мария Николаевна дьахталлар сэбиэттэрэ дьиэ кэргэҥҥэ ийэ оруолун үрдэппиттэригэр болҕомтону туһаайда:
— Үөдэй нэһилиэгэр Елена Сысолятина холобур буолар үлэни ыытара. Кини үлэтин тэтэрээтигэр былаанын суруна сылдьара. Ол курдук, нэһилиэгэр төһө дьоруой, элбэх оҕолоох ийэ баарын, үөрэҕэр мөлтөх оҕолордоох, иһэр-аһыыр кыдьыктаах төрөппүттэри суруна сылдьан, кинилэри кытта туох үлэни ыытыахтааҕын былаанныыра, кими бу ыалларга сыһыаран үлэни тэрийэрин толкуйдуура.
Ити курдук, мантан салгыы Нам улууһун дьахталларын сэбиэтэ актыбыыс-уопсастыбанньык дьахталлары кытта көрсүһэн, улуус олохтоохторун бэйэтин инстаграмыгар тардыаҕа.
Елена ПОТОЦКАЯ, “Саха сирэ” хаһыат, edersaas.ru