Нам улууһун түмсүүтэ Евгений Григорьевтыын көрүстэ...
Олох-дьаһах

Нам улууһун түмсүүтэ Евгений Григорьевтыын көрүстэ

Эҥсиэли хочотуттан төрүттээх Дьокуускай олохтоохторун түмсүүтэ олунньу 22 күнүгэр куорат баһылыгын эбээһинэһин толорор Евгений Григорьевтыын көрсөн бүгүҥҥү күн тыын кыһалҕаларын ырыттылар.

Евгений Николаевич кэлбит дьону кытта куорат кыһалҕаларын уонна инники кэскилин туһунан бэйэтин санааларын үллэһиннэ:

– Саха сирин киин куората, Дьокуускай, сыллааҕы бүддьүөтэ 18 миллиард солкуобай кэриҥэ буолар. Ити сууматтан 8 миллиарда куоракка нолуоктан уонна да атын төлөбүрдэртэн киирэр. Ол аата уоннааҕы 10 миллиарда өрөспүүбүлүкэттэн кэлэр харчы. Ити биһиги өрөспүүбүлүкэ бырабыыталыстыбатын кытта үлэлэһиэхтээхпитин көрдөрөр. Онон “мээрийэ АГИП департамена буолбатын туһугар!” диэн лозуҥу өрө тутар мөккүһээччилэр санаалара төрүт сыыһа уонна албын. Куорат сыллааҕы бүддьүөтүн улахан аҥаарын ыла олорон, утары мөрөйдөһүү сөптөөх быһыы, быһаарыныы диэн санаабаппын.

Билигин куораппыт иннигэр баараҕай сыаллар тураллар. Олортон биирдэстэрэ, мин санаабар саамай сүрүннэрэ, хаарбах, мас дьиэттэн дьону көһөрүү. Бэрт кылгас кэм иһигэр олус хомолтолоох быһылааннар буоллулар, хас даҕаны мас дьиэ умайан дьон өллө, олоҕу олоро илик оҕолор былдьаннылар. Маннык алдьархай тахсыбатын туһугар Дьокуускай куоракка уопсай мас дьиэлэр суох буолуохтаахтар. Куорат уон сыллааҕы сайдар былааныгар дьону хаарбах дьиэлэртэн көһөрүү киирэн турар, ити кыаллар дьыала.

Инники кэскилбитин кытта быһаччы ситимнээх кыһалҕа оҕолорго оскуолаҕа миэстэ тиийбэтэ. Мин алтыс кылаастан өрөспүүбүлүкэтээҕи физмат оскуолаҕа үөрэммит дьоллоохпун. Кылааспытыгар 14 оҕо буолан үөрэммиппит. Учуутал этэрин ылынарга, саһан олорбокко, көхтөөхтүк үөрэнэргэ ити улахан суолталаах. Оттон кылааска 30-40 киһи олорор буоллаҕына, үөрэх хаачыстыбата лаппа мөлтүүр. Кэлиҥҥи кэмҥэ үөрэх суолтата күүскэ үрдээтэ, барытыгар саҥа технология киирэн эрэр, онно оҕолорбут бэлэм буолуох тустаахтар. Онон оскуола тутуута, биһиги бүгүҥҥү биир тыын кыһалҕабыт буолар.

Мустубут дьон бу этиилэри биһирии иһиттилэр, эбии ыйытыылары биэрэн чопчулаатылар. Норуот хаһаайыстыбатын үтүөлээх үлэһитэ Мария Николаевна Габышева “кэлэр көлүөнэ оҕолоро саҥа кэмҥэ туох идэни талаллара ордук буолуой?” диэн ыйытта. Евгений Николаевич Дьокуускайга төрүттэнэн аан дойдуга тэнийэ сайдыбыт “Майтона”, “Индрайвер”, “Фантастик” тэрилтэлэри холобурдаан туран, “биһиги куораппыт сир баайын хостоон, собуот тутан байар кыаҕа суох, онон өй күүһүн хапытаал оҥостуохтаах” диэн хоруйдаата.

Кэбээйи “Дабаан” хаһыатын эрэдээктэрэ, 55а кварталын олохтооҕо Виктор Эверстов Залог хайдах быһыылаахтык сайдыахтааҕын ыйытта, саҥа тутуулары үрдэтэн кутуулар былыргы дьиэлэри чалбахха тимирдэр кутталлаахтарын ыйда. Евгений Григорьев бу кыһалҕа элбэх өрүттээҕин ыйда: “Залог оройуона Уһук Илин саамай кырдьаҕас куората Дьокуускай буоларын туоһулуур былыргы дьиэлэр турар сирдэрэ. Итиннэ биһиги историческай объектары көһөрөн аҕалан, туспа “Кырдьаҕас куорат” курдук туристар сылдьар сирдэрин оҥоруохтаахпыт, ити былаан үлэҕэ киирэн оҥоһулла турар. Саҥа тутуулары хайдах ыытары хас биирдиилэрин кытта туспа быһаарсыахпыт”.

Көрсүһүүгэ куорат тас көстүүтэ, чугас сытар Нам улууһун кытта алтыһыыта, таас дьиэлэргэ киирэр кирилиэс үрдүгэ, Хатастааҕы учаастактарга тутууну бобуу уонна да атын элбэх ыйытыылары ырыттылар. Түмүккэ Намтан төрүттээх Дьокуускай олохтоохторун түмсүүтэ Евгений Григорьевы өйүүллэрин биллэрдилэр уонна быыбарга кыай-хот диэн алҕаатылар.

Сандал Иванов

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

три + 2 =