Нам улууһун Кириэс-Кытыл нэһилиэгэр «Үөрэхтээһин» национальнай бырайыак чэрчитинэн бу сыл бүтүөр диэри 220 үөрэнээччигэ анаммыт, 50 миэстэлээх интэринээттээх аныгы оскуола тутуллуоҕа диэн СӨ Тутууга министиэристибэтин пресс-сулууспата иһитиннэрэр.
Тутуу судаарыстыбыннай сакаасчытынан «СӨ судаарыстыбыннай сакааһын сулууспата» буолла, тутуу бэдэрээтин «Сахастрой- 2002» ХЭО ылла.
Билигин Хамаҕатта орто оскуолата биир этээстээх мас дьиэҕэ үөрэҕин ыытар. Алын кылаастар туспа эбийиэккэ үөрэнэллэр, итиэннэ мастарыскыай эмиэ атын куорпустаах. Бу оскуолаҕа улуус атын нэһилиэктэрин оҕолоро эмиэ үөрэнэллэр. Онон үөрэх саҥа эбийиэгин тутуу бу нэһилиэккэ тыын боппуруос буолан турар.
Икки мэндиэмэннээх таас оскуола 5 тыһыынча кв.м. иэннээх буолара былааннанар, үс блок тутуллар: үөрэнэр сир, успуорт саала, мастарыскыай уонна интэринээт. Маны таһынан, саҥа оскуолаҕа быраас кэбиниэтэ, лаборатория, 156 киһиэхэ анаммыт аактабай саала, лингафоннай кэбиниэт, бибилэтиэкэ, остолобуой баар буолуоҕа.
Дьаҥ мэһэйдээн, тутууга күннэтэ 40 киһи солбуйса сылдьан үлэлиир. Үлэ тэтимнээхтик бара турар, былаан 30 %-а ситтэ.
«Саха сирэ» хаһыат, edersaas.ru
Хаартыска — СИА.