Саха сиригэр «Демография» национальнай бырайыагынан 2021 сылга «Дьахтар дьарыктаах буолуутун» бырайыагынан оскуолаҕа киирэ илик саастаах оҕолорго аналлаах 14 эбийиэк тутуллан үлэҕэ киириэхтээх. Ол курдук, бүгүн, сэтинньи 16 күнүгэр, 240 миэстэлээх уһуйаан Нам улууһун Хамаҕатта нэһилиэгэр аһылынна.
Бу туһунан нэһилиэк баһылыга Иван Николаевич Максимов сырдатта:
— Уһуйааммыт “Демография” федеральнай бырайыагынан тутулунна. Былырыын бэс ыйын 1 күнүгэр бастакы сыбаайата түспүтэ. Быйыл бу кулун тутар ыйтан саҕалаан каркаснай-монолитнай тутуу үлэтэ саҕаламмыта.
Дьиҥэ, ахсынньы ыйга былаан быһыытынан киириэхтээх этэ. Ону Алексей Семенович Пинигин салайааччылаах ХЭТ «Прогресс» тутуу тэрилтэтэ үчүгэйдик үлэлээн, бу сэтиньи ыйга уһуйааммыт аһылынна. Бу тэрилтэ үлэһиттэрэ бары түргэн тэтиминэн, дьаһаллаахтык үлэлээн биир сылы кыайбат кэмҥэ 240 миэстэлээх эбийиэкпит этэҥҥэ үлэҕэ киирдэ. Үөрүүлээх аһыллыыта бүгүн буолла. Матырыйаалынан хааччыйар үлэһит, инженер, оробуочайдар бары биир санаанан салайтаран үлэлииллэрин биһирээтибит. Барытын эрдэ дьаһанан, нэһилиэккэ контейнердэри туруортаан, матырыйаалларын барытын эрдэттэн тиэйэн бэлэмнээбиттэрэ. Онон суолга-иискэ туох да харгыһы көрсүбэтилэр.
Оҕолор утуйар оронноро, миэбэллэрэ, утуйар таҥастара-саптара барыта эрдэ кэлбитэ. Тутуу аныгы ирдэбилгэ эппиэттиир. Бу сэтинньи 12 күнүгэр Саха Өрөспүүбүлүкэтин тутуу нодзуорун көҥүлүн биэрдэ. Биһиги улууспут дьаһалтатын архитектора бу эбийиэги үлэҕэ киллэрэргэ диэн бэйэтин түмүгүн биэрбитэ. Икки уһуйааммыт урут икки юридическэй сирэй буолан үлэлээбит эбит буоллахтарына, билигин холбоһон биир улахан буоллулар. “Тускул” диэн ааттаах. Үөрэтэр чааһыгар көҥүл ыллылар да, тэрилтэбит ахсынньы ыйга үлэтин саҕалыаҕа диэн эрэнэбит.
Ульяна ЗАХАРОВА.