Хатыҥ-Арыы нэһилиэгэр «Озернай» кыбаарталага “Тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы” Өрөспүүбүлүкэтээҕи бырагыраамма чэрчитинэн тутуллубут 14 саҥа дьиэ күлүүһүн оҕолорго туттардылар. 13-16 суотай иэнннээх уһаайбалаах, толору хааччыллыылаах, 48 кв.м иэннээх дьиэлэри «Диамантер» ХЭТ бэдэрээтчиктээн (ген. дир. А.Т. Захаров) туппут.
Бу дьиэлэри тутууга 2017 сылга 22 мөл. 402 тыһ. 872 солк. үп-харчы көрүллэн оҕолорго үтүө бэлэх буолла. Иэримэ дьиэ аһыллыытын үөрүүлээх түгэнигэр үтүө үгэһинэн аал уоту оттон, сахалыы сиэринэн-туомунан, оҕолор этэҥҥэ олороллоругар Үрдүк Айыыларга алгысчыт Петр Охлопков сүгүрүйдэ.
Саҥа дьиэлэр аһыллыыларын бэлиэтиир аалай кыһыл лиэнтэни Нам улууһун баһылыгын тутууга уонна олох-дьаһах хомунаалынай хаһаайыстыбатыгар солбуйааччы Степан Матвеев, оҕолору иитии уонна хааччыйыы отделын салайааччыта Анастасия Сивцева, Хатыҥ Арыы нэһилиэгин баһылыга Юрий Слепцов, «Диамантер» ХЭТ генеральнай дириэктэрэ Альберт Захаров уонна саҥа дьиэ хаһаайына Олег Стручков быстылар.
Оҕолор дьиэлэрэ куруутун сылаас, сырдык буоларыгар, көрөн-харайан олороллоругар, уһаайбаларыгар оҕуруот аһын олордоллоругар, иллээх буолалларыгар баҕаран туран улуус баһылыгын солбуйааччы Степан Матвеев оҕолорго дохсун ытыс тыаһын доҕуһуолунан күлүүстэри туттарда. Дьиэлэри ылбыт оҕолор ааттарыттан Люба Попова Саха Өрөспүүбүлүкэтин салалтатыгар, улуус дьаһалтатыгар, оҕолору иитии уонна хааччыйыы отделыгар, дьиэни туппут тэрилтэҕэ, Хатыҥ Арыы баһылыгар ис сүрэҕиттэн махталын биллэрдэ. «Озернай» кыбаарталга 14 дьиэ хаһаайыттарынан, Хатыҥ Арыыттан, Намтан, Хамаҕаттаттан, Түбэттэн, Таастаахтан, Искраттан, 2 Хомустаахтан төрүттээх оҕолор ыллылар. Онон бу нэһилиэктэр баһылыктара оҕолорун үөрүүлэрин тэҥҥэ үллэстэн, бэйэлэрин эҕэрдэлэрин эттилэр уонна сэмэй бэлэхтэрин туттардылар.
Нам улууһун Хатыҥ Арыы нэһилиэгин Аппаанытыгар «Тыа сирин бигэ туруктаахтык сайыннарыы» диэн бэдэрээлинэй бырагыраамма чэрчитинэн «Озернай» кыбаартал тэриллибитэ. Уопсайа 455 учаастак түҥэтиллэн саҥа дьиэлэр дьэндэһэн көрүөххэ үчүгэй кыбаартал буолан турар. Оттон 21 учаастага тулаайах уонна төрөппүт көрүүтэ-истиитэ суох хаалбыт оҕолорго анаммыт. «Озернайга» уот, күөх төлөн, сайыҥҥы уу ситимэ тардыллан толору оҥоһуллан турар. Онон оҕолор олороллоругар толору усулуобуйа баар буолла. Аны сайын бу кыбаарталга эбии сэттэ оҕоҕо маннык дьиэ күлүүһүн туттарыахтара.
Семен Аргунов, Нам улууһа,
ааптар хаартыскаҕа түһэриитэ.