Нам улууһугар оперативнай ыстаап дьаһалтаны кытта ыкса сибээстээх
Бу күннэргэ өрөспүүбүлүкэҕэ коронавирус турар куттала суоһаабытынан, бары улуустарга баһылыктар араас өрүттээх үлэни ыыталлар.
edersaas.ru
Нам улууһун баһылыга Юрий Слепцов иһитиннэрбитинэн, улууска оперативнай ыстаап тэриллэн үлэлиир.
— Сүрүн бородуукта ахсаанын ааҕа-суоттуу сылдьабыт. Сыана үрдүүрүн кыраҕытык кэтиибит. Оскуолалар дистанционнай үөрэтиигэ киирдилэр. Улуустааҕы IT-киини кытта учууталлар ыкса сибээстээхтик үлэлииллэр. Бары тэрээһиннэр тохтообуттарынан сибээстээн, култуура уонна спорт салаатын үлэһиттэрэ дьиэлэригэр олорон үлэлииллэр. Балыыһаҕа эмп-томп тиийэр. Арай харыстанар мааска тиийбэт буолан, «Кэрэ» ательены кытта кэпсэтэн, нэһилиэнньэҕэ анаан тиктэрдибит.
Оперативнай ыстаап улуус дьаһалтатын кытта ыкса сибээстээхтик үлэлиир, — диэн сонунун үллэстэр улуус баһылыга Юрий Слепцов.
Елена ПОТОЦКАЯ, «Саха сирэ» хаһыат, edersaas.ru
Хаартыска: улуус дьаһалтатын тиксэриитэ