Нам улууһугар куоластааһыны тэрийиигэ биир дойдулаахтар өйөбүл оҥордулар
Бүгүн РФ Төрүт Сокуонугар уларытыылары киллэриилэргэ куоластааһын бүтэһик күнэ.
edersaas.ru
Саха сирин үрдүнэн куоластыыр учаастактарга (ТИК) 8600 хамыыһыйа чилиэнэ үлэлиир. Бу учаастактарга коронавирус сыстыганнаах дьаҥын бохсор, сэрэтэр бары миэрэлэр толору тутуһуллаллар.
Нам улууһунааҕы киин быыбардыыр хамыыһыйа салайааччыта Майя Софронова иһитиннэрбитинэн, Намтан төрүттээх биир дойдулаахтар түмсүүлэрэ дьонноругар-сэргэлэригэр куоластааһын кэмигэр анаан харыстанар тэриллэри эбии атыылаһан көмөлөспүттэр.
— Төрөөбүт Намнарыгар өрүү күүс-көмө, өйөбүл буолар биир дойдулаахтарбытыгар Георгий Ефимович Белоусовка, Мария Николаевна Габышеваҕа, Александр Тарасович Никифоровка уонна Нам улууһуттан төрүттээх биир дойдулаахтарбыт түмсүүлэригэр улуустааҕы киин хамыыһыйа аатыттан барҕа махталбытын тиэрдэбит. Кинилэр холобурдарын көрө сылдьан, ыччаттарбыт төрөөбүт дойдуларыгар бэриниилээх буола улааталлар, — диэн санаатын үллэстэр Майя Софронова.
Ити курдук, Ийэ дойдуга бэриниилээх буолуу сылыгар, Нам улууһун землячествота биир дойдулаахтара Арассыыйа, өрөспүүбүлүкэ, улуус таһымнаах бары тэрээһиннэри ыыталларын көхтөөхтүк өйүүллэрэ атын улуустарга холобур буоллун!
Елена ПОТОЦКАЯ, «Саха сирэ» хаһыат, edersaas.ru
Хаартыска – Майя Софронова тиксэриитэ.