Аҕыйах сылынан дойдубут экономиката сайдарыгар улахан оруолу информационнай технологиялар ылыахтара. Биүиэхэ, Нам улууһугар ИТ-ырыынак хайдах сайдарый? 2032 сылга тугу ситиһиэхтээхпитий? Ол инниттэн билигин туох быһарыылары ылыахтаахпытый?
Бу тирээн турар боппуруостары ырытыһар сыаллаах Дьокуускайтан «Якутия» Технопарк, «Кванториум» оҕо технопаркатын, «Деловая Россия» бизнес-сообщество, СР информационнай технологиялары сайыннарыы Ассоциациятын, Нам улууһун бизнеһин бэрэстэбиитэллэрэ, улуус үөрэҕириитин, культура, ыччат уонна коммунальнай өҥөнү онорор тэрилтэлэрин үлэһиттэрэ тохсунньу 26 күнүгэр Партизан оскуолатыгар «Развитие ИТ-отрасли в Намском улусе» диэн форсайт-сессияҕа (кэлэр өттүгэр тугу ситиһэр туһунан сессия) мустан информационнай технологиялар улууска сайдыыларын стратегиятын толкуйдаатылар, этии киллэрдилэр, сүбэлэстилэр, дьүүллэстилэр.
Кэскиллээх тэрээһини «Нам улууһа» МТ дьаһалтата уонна үөрэҕирии управлениета тэрийэн ыыттылар.
Сессия үөрүүлээх аһыллыытыгар улуус баһылыга Ю.И. Слепцов мустубут дьону эҕэрдэлээтэ уонна олунньу 8 кунугэр Нам улууһугар ИТ-киин аһылларын иһитиннэрдэ. СР инновацияларга, цифровой сайдыыга уонна информационнай технологияларга миниистирин солбуйааччыта Е.Р. Макаров бүгүҥҥү тэрээһин республикаҕа улуус араас тэрилтэлэрин хабар бастакы форсайт-сессия буоларын тоһоҕолоон бэлиэтээтэ.
Бу күн «Нам улууһа» МТ баһылыга Ю.И. Слепцов уонна «СР ИТ-салаа сайдыытын ассоциацията» НП-тын толорор директора М.В. Стручков бииргэ үлэлээһин сөбүлэҥэр илии баттаатылар. «Аан дойду трендэлэрэ» диэн лекция кэнниттэн сессия кыттыылаахтара 3 бөлөххө арахсан, Нам улууһугар ИТ-салаа сайдыытын бырайыактааһыҥҥа кытыннылар уонна бэйэлэрин көрүүлэрин киэҥ дьүүлгэ таһаардылар.
edersaas.ru