Доруобуйа Уопсастыба

Нам улууһугар быһыыны биэрии салҕанар

Ыам ыйын 18 күнүнээҕи туругунан Нам оройуоннааҕы киин балыыһатыгар барыта 2070 доза  «Гам- Ковид- Вак» уонна 390 доза «Эпивакорона» кэлбитэ биллэр. Ол иһиттэн 300 доза «Гам-Ковид-Вак» вакцина бэҕэһээ аҕалыллыбыта.

Билигин Нам оройуонугар «ГамКовидВак» вакцина бастакы быһыытын 1761 киһи, иккиһин 1416 киһи ылбыт. Ону сэргэ «Эпивакорона» вакцина бастакы компонена – 337 киһи, иккис компонент – 75 киһи.

Нам улууһугар барыта 8 быһыыны биэрэр пуун тэриллэн үлэлиир. Нам сэлиэнньэтигэр быһыыны биэрэр 2 кэбиниэт үлэлиир, ону таһынан быһыыны биэрэр пууннарга чугастааҕы сытар нэһилиэктэр сыһыарылыннылар:  1-Хомустаахха — Ымыйахтаах, Партизан, Хамаҕаттаҕа  — Никольскай, Хатырыкка — Модут,  Маймаҕа, Көбөкөҥҥө — Арбын, Фрунзе, ону таһынан туһунан пуун 2-Хомустаах нэһилиэгэр арылынна. Оройуонтан тэйиччи  Искра, Таастаах, Салбаҥ, Граф Биэрэгэ, Кыһыл дэриэбинэ  нэһилиэктээх пууннарыгар   көһө сылдьар  биригээдэ үлэлиир.

Хас биирдии быһыыны оҥорор кэбиниэккэ  быраас эбэтэр биэлсэр вакцинаны ылыахтаах киһи доруобуйатын кичэйэн көрөр. Ол эрэ кэнниттэн, киһи доруобуйатыгар туох даҕаны суоһаабат буоллаҕына, сиэстэрэ быһыыны туруорар. Быһыыны ылар пуун үлэһиттэрэ бары COVID-19 саҥа коронавирус дьаҥын утары быһыыны оҥорор көҥүллээхтэр. Ону тэҥэ пууннарга вакцинаны харайарга наадалаах оборудование барыта баарын туһунан Нам оройуоннааҕы киин балыыһатын пресс-сулууспата иһитиннэрэр.

Бүгүҥҥэттэн Нам оройуонугар»Гам-Ковид-Вак» вакцинаны бастакыларын ылбыт дьоҥҥо иккис быһыыларын туруоруу саҕаланна.

 

edersaas.ru

0
0