Бүгүҥҥү туругунан Нам улууһугар уопсайа 582 ынах төрөөтө. Бу туһунан улуус дьаһалтатын пресс-сулууспата иһитиннэрдэ.
Арбыҥҥа – 11 , Бөтүҥҥэ – 72 , Үөдэйгэ – 10, Искраҕа – 29, Ленскэйгэ –4 , Модукка – 49 , Никольскайга – 19, Партизаҥҥа – 23, Салбаҥҥа – 21 , Таастаахха – 43 , Түбэҕэ -45 , Фрунзеҕа — 5 , Хамаҕаттаҕа- 41, Хатыҥ Арыыга – 73 , Хатырыкка –32 , 1 Хомустаахха –42 ,2 Хомустаахха-42, Маймаҕаҕа- 10 ынах төрөөтө.
Саас кыстык бүтэрин саҕана сүөһү, сылгы доруобуйата улаханнык мөлтүүр, үгүстүк ырыганнааһын, сүөһү тымныйыыта бэлиэтэнэр. Ону тэҥэ ынах сүөһү, биэ төрүүр кэмэ буолан сытан хаалыахтарын сөп, төрүөх мөлтүүр. Араас сыстыгана суох ыарыынан ыалдьаллара үрдүүр. Маны эрдэттэн сэрэтэр миэрэлэри, дьаһаллары туһанар туһунан Намнааҕы ветеринарнай сулууспа исписэлииһэ Анита Румянцева кэпсээтэ:
— Сүөһү, сылгы өлүүтэ үксэ бириэмэтигэр эмтэммэтиттэн тахсар. Ол хаһаайыстыбаларга улахан хоромньуну үөскэтэр. Ол иһин эрдэттэн сэрэтэр үлэни ыытар ордук. Улахан тымныылар бүппүттэрин кэннэ, сүөһүнү таһырдьа таһааран чэччитэр, уулатар туһалаах.
Астарыгар эбии аһылык эбэн туус, брикет оҥорон сиэттэххэ организмнарыгар тиийбэт наадалаах микроэлеменнэри, битэмииннэри ылаллар. Саас биир саамай үчүгэй ньыма – харыйа лабаатын оргутан туһаныахха сөп. Харыйа лабаатыгар халлаан сымныырыгар элбэх С битэмиин мунньуллар, туһалаах эттиктэр (минеральные вещества), организмҥа наадалаах туустар, каротин бааллар. Харыйа 2-3 лабаатын тоһутан ылан 5 лиитэрэ ууга оргуйбутун кэннэ, иһитин хаппаҕын ылан 30 мүнүүтэ тэптэриллэр. Сойбутун кэннэ сиидэлээн баран, ынахха күҥҥэ биирдэ, 1 лиитэрэни сарсыарда аайы 7-10 күн устата иһэрдиэххэ сөп. Тимэх оту, ромашканы, боҕуруоскай оту эмиэ оргутан иһэрдэллэр. Кинилэр иммунитеты бөҕөргөтөллөр, ис, тымныйыы ыарыытыгар олус туһалаахтар. Бу этиллибит бэрт боростуой ньымалары тускутугар туһаныҥ, сүөһүгүт, сылгыгыт доруобай буоллуннар.
«Нам улууһа» МТ пресс-сулууспата