Бэлиитикэ Тыа хаһаайыстыбата

Нам улууһугар 100 төбөҕө анаммыт хотоннор үлэҕэ киирдилэр

Нам улууһун I Хомустааҕар уонна Модукка “Илгэ Хотун” уонна “Саха” бааһынай хаһаайыстыбалар дьоҕус, орто предпринимательствоны сайыннарыы национальнай бырайыак чэрчитинэн, субсидиянан туһанан аныгылыы оборудованиелаах саҥа хотоннору тутан олоххо киллэрдилэр.

“Саха” ТХПК былырыын кыһын ахсынньыга куонкуруска кыайан, 7 мөлүйүөн солкуобайдаах субсидияны ылбыта. Билигин хаһаайыстыба 60 төбө сүөһүлээх, итинтэн сүүрбэтэ – ынах. “Илгэ Хотун” эмиэ 7 мөлүйүөн солкуобайдаах тутууну ыытта. Ити сууматтан 800 тыһыынча солкуобай бааһынай хаһаайыстыба бэйэтин үбүлүлээһиниттэн барда. “Илгэ Хотун” билигин 76 төбө хороҕор муостааҕы тутан олорор.

Тыа хаһаайыстыбатын миниистирэ Александр Атласов бэлиэтээбитинэн, саҥа хотоннор улууска сүөһү ахсаанын элбэтиигэ, бородууксуйаны оҥорон таһаарыыга төһүү буолуохтаахтар. Санатан эттэххэ, бу маннык хотоннору тутуу “Фермердэри уонна бааһынай хаһаайыстыбалары сайыннарыы систиэмэтэ” эрэгийиэннээҕи бырайыак нөҥүө ыытыллар. Бу бырайыагынан былырыын алта бааһынай хаһаайыстыба субсидияны ылбыта. Быйыл 16 кооперативка уопсайа 98 мөлүйүөн суумалаах субсидия көрүллүбүтэ.

Аграфена КУЗЬМИНА

0
0