Нам улууһа сайдар

Бөлөххө киир:

Бэҕэһээ РФ  Судаарыстыбаннай Дууматыгар дьокутаата Галина Данчикова   Нам улууһугар Аппааны нэһилиэгэр   Култуура киинин тутуутун көрдө-иһиттэ уонна  быйыл  үбүлүөйдээх 150 сылын бэлиэтиир И.Гаврильев аатынан  1 №-дээх орто оскуолаҕа Билии күнүн тэрээһинигэр кытынна.

Кэлиҥҥи кэмҥэ Нам улууһа биллэ сайынна. Социальнай  инфраструктура уонна социальнай хабааннаах эбийиэктэр тутуллубуттарын түмүгэр, дьон-сэргэ кэлэн олохсуйуута элбээбит. Аҕыйах сыл иһигэр хас даҕаны оҕо саада, оскуола, успуорт кииннэрэ тутуллан  үлэҕэ киирдилэр.  Былааҥҥа кырдьаҕастарга уонна инбэлииттэргэ аналлаах интэринээт-дьиэ куорпуһун тутуу баар.

 

Быйыл улууска үөрэхтээһин тэриллибитэ 150 сыла буолар. Ол эбэтэр И.Гаврильев аатынан  1 №-дээх орто оскуола оруобуна итиччэ сыл оҕолору үөрэтэн, олох киэҥ аартыгар атаарбыт. Ил Түмэн спикерэ Алексей Еремеев тэрээһиҥҥэ сылдьан,  кэлэр сылга оскуолаҕа хапытаалынай өрөмүөн ыытыллыахтааҕын туһунан иһитиннэрдэ.

Галина Данчикова  уонна  Алексей Еремеев  Намнааҕы техникумҥа сылдьан, үөрэх бырассыаһа хайдах-туох саҕаламмытын билистилэр. Санатар буоллахха, кыһа өрөспүүбүлүкэҕэ үрдүк таһымнаах сварщиктары үөрэтэн таһаарар.  Ол эрээри, кыһа уопсай дьиэтэ 1963 сыллааҕы тутуу буолар, биирдии хоско түөртүү устудьуон олорор эбит.

Галина Данчикова итинник усулуобуйаҕа устудьуоннар олоруо суохтаахтарын ыйда.  Бу иннинэ дьокутаат  техникум спортивнай саалатын баһаар кэнниттэн чөлүгэр түһэриигэ үбү көрөргө кыттыбыта.  Кини федеральнай бырагыраама чэрчитинэн, уопсай дьиэ саҥа куорпуһун тутууга үбү булууга көмөлөһүөм диэн эрэннэрдэ.

Нэһилиэнньэни кытта көрсүһүүгэ олохтоохтор  улууһу сайыннарарга анаан араас хабааннаах бырайыактар баалларын туһунан иһитиннэрдилэр. Дьокутаакка  ойуур баһаарын боппуруостарыттан саҕалаан  саҥа оскуолалары тутууга, дьоҕус биисинэскэ өйөбүлү оҥорууга тиийэ ыйыталастылар.  Галина Данчикова РФ Бэрэсидьиэнэ Владимир Путин эрэгийиэҥҥэ ойуур баһаарын умуруорууга  көрүллэр үбү икки төгүл улаатыннарбытын, ол эбэтэр ол суума 24 млрд солкуобай буолбутун иһитиннэрдэ. Итиччэ үп көрүллэригэр  Ил Дархан Айсен Николаев улахан, сөптөөх үлэни ыыппытын тоһоҕолоон бэлиэтээтэ.

Андрей Михайлов.

 

+1
0
+1
0
+1
0
+1
0
+1
0
+1
0
+1
0