СӨ бырабыыталыстыбатын бэрэссэдээтэлин солбуйааччытын эбээһинэһин толорооччу Михаил Никифоров бэҕэһээ, атырдьах ыйын 15 күнүгэр, тыа хаһаайыстыбатын миниистирэ Александр Атласовы кытта Нам улууһугар бара сырыттылар.
edersaas.ru
Оробуочай сырыы туһунан Михаил Никифоров инстаграмҥа страницатыгар:
— Арыыларга оттооһун хайдах баран иһэрин билистибит. Өлүөнэ өрүс уута тахсан отчуттар күчүмэҕэйдэри көрсүбүттэрин эттилэр. Ол да буоллар дьон санаата бөҕөх, сөптөөх отторун арыылартан оттуур былааннаахтар.
Саха Өрөспүүбүлүкэтин тыатын хаһаайыстыбатын министиэристибэтин иһинэн үлэлиир «Устойчивое развитие сельских территорий» программа чэрчитинэн II-с Хомустаах нэһилиэгэр тутулла турар «Сэргэлээх» кыбартаал тутуутун көрдүбүт. Бары үлэтин бу сылга түмүктүүр былааннаахтар.
Күнү-дьылы былдьаһа тыа дьоно кыстыкка бэлэмнэнэр. Бөтүҥ нэһилиэгэр Надежда Попова уонна Анна Сивцева бааһыный хаһаайыстыбаларыгар саҥа хотон тутта сылдьаллар эбит. Фермердэр сүөһүлэрин төбөтүн ахсаанын элбэтэр сыаллаахтар. Надежда Попова 150 төбө, онтон Анна Сивцева 50 төбө киирэр хотоннорун тутта сылдьаллар.
Салгыы “Эрэл” кэпэрэтиипкэ сырыттыбыт.
Кэпэрэтиип салайааччыта Гуляев Н.Ф. Нам улууһугар үүт соҕотуопкатыгар инники сылларга былаанын уонна кыһалҕалаах боппуруостарын туруоруста.
Оҕуруот аһын олордуунан дьарыктанар фермер Александр Жирков бааһыналарын көрдүбүт.
Быйыл кураан сайын буолан элбэхтэ уу куттубут дииллэр. Өлүөнэ эбэбит уулаах буолан абыраата диэн уөрэллэр.
Государство өттүттэн өйөбүл баар буолан дьон тыа хаһаайыстыбатынан дьарыктанар санаалаахтарыттан үөрдүм. Көрсүһүү кэмигэр дьон өйөбүл баар буолан үлэлии-хамсыы олороллорун эттилэр.
Санатан этэбин, көрсүһүүлэр коронавируснай инфекцияттан сэрэхтээх буолуу дистанциятын уонна санитарнай ирдэбиллэрин тутуhан буоллулар», — диэн иһитиннэрдэ.
edersaas.ru