Бүгүн уонна сарсын, ыам ыйын 25-26 күннэригэр, Нам улууһун киинигэр стадиоҥҥа «Дыгын оонньууларыгар» кыттарга иккис сүүмэрдиир түһүмэх ыытылла турар.
Алта путевка иһин Саха сирин араас муннуктарыттан 49 уол илин-кэлин түсүһэ кэлбит. Уйбаан Белолюбскай салайар «Боотур» кулуубуттан 13, ЧИФКИС-тэн 6 кыттааччы баар. Улуустарынан бардахха, Мэҥэ Хаҥаластан, Хаҥаластан, Намтан, Орто Халыматтан, Чурапчыттан, Уус Алдантан, Ньурбаттан, Бүлүүттэн, Кэбээйиттэн, Өлүөхүмэттэн, Амматтан, Үөһээ Бүлүүттэн, Томпоттон, Өлөөнтөн уо.д.а. кэлбиттэр.
Саамай элбэх кыттааччы Мэҥэ Хаҥаластан уонна Намтан бааллар. Күрэхтэһии сүрүн судьуйатынан Дмитрий Шарин, сэкирэтээринэн Гаврил Попов, судьуйа-информаторынан Илья Скрябин үлэлииллэр. Күрэхтэһээччи элбэҕин көрөөччүлэр да, тэрийээччилэр да сэргээтилэр.
Чуолаан эдэр уолаттар күүстэрин холоно кэлбиттэрин биһирээтилэр. Кинилэри сэргэ номнуо хаһыс да төгүлүн «Дыгыҥҥа» кыттар уолаттартан Петр Старостин (Чурапчы), Артем Варданян (Нам), Антон Тойтонов (Нам), Леонид Филиппов (Амма), Алексей Иванов (Үөһээ Бүлүү) бааллар.
Бастакы түһүмэх «үс төгүл үс» ыстаҥа бастакы холонуута стадиоҥҥа буолла, ол эрээри ардах мэһэйдээн күрэхтэһии салгыы манежка көстө. Бу түһүмэххэ 32 м 53 см көрдөрүүлээх Давыд Дмитриев (Кэбээйи) бастаата. Онтон иккискэ 32 м 22 см көрдөрүүлээх Леонид Филиппов (Амма), үһүскэ Василий Гаврильев (Мэҥэ Хаҥалас) 32 м 24 см көрдөрүүлээх таҕыстылар. Бу уолаттар үһүөн атах оонньууларыгар СӨ спордун маастардара буолаллар.
Санатан суруйдахха, «Дыгын оонньууларын» бастакы миэстэлээҕэ Егор Филиппов (Хаҥалас) уонна «Чөмпүйүөн Куубага» турнир кыайыылааҕа Дьулустаан Ноговицын (Горнай) путевкалаахтар. Егордаах Дьулустаан «Боотур» СК иитиллээччилэрэ буолаллар. Маны сэргэ бастакы сүүмэрдиир түһүмэх түмүгэр оонньууга кыттар быраабы Айсен БОТУЕВ (Үөһээ Бүлүү), Павел ДРУЗЬЯНОВ(Чурапчы), Владимир ФЕДОРОВ (Ньурба), Иннокентий КОЛЕСОВ (Кэбээйи) уонна Алексей УВАРОВСКАЙ (Кэбээйи) ылбыттара.
Ол эрээри, Ньурба хоһууна Владимир Федоров «Бүлүү Боотура» күрэхтэһиигэ кыттар буолбутунан сибээстээн, «Дыгын оонньууларыттан» аккаастаммыта. Онон, иккис сүүмэрдиир түһүмэххэ — бүгүн уонна сарсын — алта путевка оонньонор.
Бүгүн эбиэт кэнниттэн, 14.30 чаастан, тутум эргииригэр күрэхтэһии стадион манеһыгар саҕаланыаҕа.
Иккис сүүмэрдиир түһүмэх бырагыраамата
Ыам ыйын 25 күнэ
09.00 – 10.00 –мандат хамыыһыйата, кыттааччылар сэрэбиэйдэһиилэрэ;
10.00 – 10.30 – хамаанда бэрэстэбиитэллэрэ кыттыылаах судьуйалар мунньахтара;
10.30 – 11.00 – күрэхтэһиини үөрүүлээхтик арыйыы;
11.00 – 13.00 – “Үс төгүл үс”;
13.00 – 14.00 – тохтобул;
14.00 – 16.30 – “Тутум эргиир”, мас тардыhыыта;
16.30 — 17.00 — бастакы күн түмүгүн таһаарыы.
Ыам ыйын 26 күнэ
09.30 – 10.00 – судьуйалар мунньахтара;
10.00 – 16.00 – оҕунан ытыы, 400 м сүүрүү, хапсаҕай, тааһы көтөҕүү;
16.00 – 16.30 – кыайыылаахтары наҕараадалааһын.
edersaas.ru