Сыстыганнаах дьаҥ өрө турбут кэмигэр Нам улууһун Салбаҥа өрөспүүбүлүкэ олохтоохторун болҕомтотугар киирбитэ.
edersaas.ru
Саха сирин бары ыраах сытар кытыы нэһилиэктэрин олохтоохторо «улахан ыарыы турдаҕына хайдах буолабыт?» диэн куттана олорор кэмнэригэр, Салбаҥ өрүс нөҥүө сытар, суола-ииһэ суох буолан, бу нэһилиэк дьаҥтан хайдах босхолонорун куйаар ситимин нөҥүө анаан кэтээн көрүү үгүс этэ.
Бүгүн куоластааһын курдук эппиэтинэстээх тэрээһин Салбаҥҥа хайдах бара турарын Нам улууһунааҕы территориальнай быыбардыыр хамыыһыйа салайааччыта Майя Софронова бу курдук иһитиннэрэр:
— Салбаҥҥа 318 киһи олорор, онтон куоластааччыта — 215 киһи.
Бэҕэһээҥҥи туругунан 93 киһи кэлэн көхтөөхтүк кэлэн куоластааһыҥҥа кыттыыны ылла.
Онтон быыбардыыр учаастакка 86 киһи кэллэ. Дьиэтигэр олорон 7 киһи куоластаата.
Бу күннэргэ Салбан нэһилиэгэр үлэ күөстүү оргуйар. Үүт туттарыыта саҕаланна, дьон сэргэ сэргэхсийдэ.
Үгүс киһи дьиэҕэ олоруу хааччах эрэсиимиттэн босхолонон, үлэ үөһүгэр түстүлэр.
Үс оскуоланы бүтэрээччи БКЭ туттараары Намҥа обсерваторга 2 нэдиэлэтээҕи харантыыҥҥа сытан таҕыстылар. Билигин оҕолор аймахтарыгар олорон, БКЭ-ҕэ бэлэмнэнэллэр.
… Ити курдук салбаннар ыксаллаах быһыы-майгы балаһыанньататыттан босхолонон, күн солото суох хаһаайыстыбаларыгар түбүгүрэллэр.
Елена ПОТОЦКАЯ, «Саха сирэ» хаһыат, edersaas.ru