Нам Никольскайын түмэлэ сонун бырайыагы олоххо киллэрдэ

Ааптар: 
Бөлөххө киир:

Нам улууһун Никольскайдааҕы И.С.Шарапов аатынан сири туһаныы түмэлэ «Нуучча тиэргэнэ» бырайыагынан үлэлээбитэ иккис сыла.

Бу туһунан мусуой научнай үлэһитэ  Оротоо Сандаара Саха Аар кыыһа кэпсиир:

Бу — саҥа бырайыак. Сыстыганнаах дьаҥ кэнниттэн дьону түмэлгэ тардыы биир сонун ньымата. Мусуой үлэһиттэрэ тиэргэннэригэр баар бурдук ыһар бааһыналарыгар подсолнух олордон, холуодьас макетын оҥорон,  сибэккилэри туруоран, хаартыскаҕа түһэр муннуктары оҥорон,  дьон болҕомтотун тартылар. 

Бырайыак бэйэтин соругун ситтэ — билигин баһаам элбэх киһи кэлэн, мусуойу көрөн, сэргээн, тупсаҕайдык оҥоһуллубут муннуктарга хаартыскаҕа дуоһуйа түһэн, астынан, үөрэн-көтөн бараллар.

Мусуой биир өттүгэр  саха балаҕана баар. Онно көмүлүөк оттон, алаадьылаан көрсөллөр. Отчут отуута, балыксыт муннуга, сылабаар, ат моһуоннаах  мас эрбиир тэрил — барыта саастаах дьоҥҥо урукку олохторун санатар, оҕолорго иитэр-үөрэтэр үлэ барар.

Аҕам саастаах көлүөнэ балаҕаҥҥа астаах кэлэн, көрсүспүччэ кэпсэтэн, сылабаар  чэйин амсайан барар.

Бу барыта мусуой үлэһиттэрэ, дириэктэр  Прасковья Протопопова, Светлана Протопопова мусуойу көрөөччү бэйэлэрин күүстэринэн тэрийбит үлэлэрэ.

Мусуой иһинэн тэриллибит «Нива»  ырыа ансамбылын ырыаларын холбоон, дьон сүргэтэ көтөҕүллэн, үҥкүүлээн да ылаллар.

Мусуойу көрөөччүлэр 50 солк., хаартыскаҕа түһээччилэр — 100 солк., көстүүм уларсааччылар — 100 солк.  төлөөн, мусуой салгыы араас  сонун бырайыагы олоххо киллэрэригэр өйөбүл оҥордулар.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0