Бүгүн Ил Дархан Айсен Николаев Анал этиилээх быһа эпииргэ таҕыста. Суол тутуутугар сыһыаннаах боппуруоска тохтоон, кини 30 сыл устата тутуллубут Кэбээйи улууһун суола быйыл дьэ, ситэриллибитин бэлиэтээтэ.
«Биһиги урукку өттүгэр тыа сиригэр куһаҕан суолу-ииһи кытта сөбүлэһэн олорбуппут. Билигин Кэбээйигэ диэри аҕыйах чааһынан кыһыннары-сайыннары айанныыр суол баар буолла. Маны сэргэ 25 сыл устата Максим Кирович Аммосов төрөөбүт нэһилиэгэр Нам улууһун Хатырыгар суол оҥоһуллубута. Бу үлэ ситэриллиэҕэ. 2024 сылга диэри өрөспүүбүлүкэҕэ 550 км суол оҥоһуллуоҕа. 200 км эрэгийиэннээҕи таһымнаах суоллар оҥоһуллуохтара. Маны таһынан Дьокуускай куорат иһинээҕи суоллары өрөмүөннээһин үлэтэ ыытыллыаҕа. Куорат дьаһалтата уонна тырааныспар министиэристибэтэ 45 км кырата суох суолу үбүлүүргэ, оҥотторорго үлэни тэрийэргэ бэлэм буолуҥ», — диэн Ил Дархан эттэ.
edersaas.ru