“Нам” эрэгийиэннээҕи массыына суолун саҥардан оҥоруу 2022 сыл бүтүүтэ түмүктэниэҕэ
Нам суола , дьэ, тупсар буолбут. Хайдах?
“Нам” массыына суола уһун кэмҥэ эрэгийиэн кыһалҕалаах суолларыттан биирдэстэрэ буолбута. “Куттала суох хаачыстыбалаах суоллар” нацбырайыагынан суол учаастактарыгар өссө былырыын өрөмүөн уонна тутуу үлэтэ саҕаламмыта.
Билигин суолу тутуу 11+400 — км 18+500 (1 аһарар комплекс) км саҥардыы үлэтэ ыытыллар. Хапытаалынай тутуу, өрөмүөн уонна саҥардыы Нам улууһун уонна Дьокуускай куорат сирдэрин-уоттарын хабар.
От ыйын 17 күнүгэр “Нам” суолун саҥардыы хаамыытын Саха сирин баһылыга Айсен Николаев билистэ.
Учаастагы көрөн баран Айсен Николаев үлэ болдьох быһыытынан 2023 сылга түмүктэниэхтээх диэн бэлиэтээтэ, ол эрээри бүгүн 2022 сыл бүтүүтэ түмүктүүр соругу туруорда.
Эрэгийиэннээҕи массыына суолун саҥардан оҥоруу бастакы түһүмэҕэ көхтөөхтүк ыытылларын бэлиэтээтэ. Хас биирдии өттүгэр иккилии балаһаҕа тиийэ кэҥэтэллэр эбит.
Маны сэргэ “Үрүҥ күөл” ырыынагын учаастагыттан Мархатааҕы обелиска диэри түөрт балаһаҕа диэри кэҥиэхтээх. “Бырайыак билигин чинчийиини ааһар. Куорат маны түргэнник быһааран, кэлэр сылга үлэ саҕаланыахтаах диэн эрэнэбит. Куоракка киириигэ уонна тахсыыттан кыараҕас буолуо суохтаах. Маннык сорук Покровскай аартыкка ГАИ пуоһун диэки “Умнас” эрэгийиэннээҕи суолга эмиэ туруорулунна. Бу Өлүөнэ муостатын тутуунан олус наадалаах”, — диэн Айсен Сергеевич бэлиэтээтэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин хаартыската
Бэлэмнээтэ Женни Стрюкова.