Нам эдэр урбаанньыта мастарыскыай тэриннэ

— Бэйэ дьыалатын тэриниэхпэр диэри атын урбаанньыттар мастарыскыайдарыгар үлэлээбитим. Онон бу дьыаланы иһиттэн билэбин диэхпин сөп.

— Оттон тоҕо атын хайысханы тутуспакка, урбааны таллыҥ?

— Биисинэһинэн дьарыктаныахпын баҕарар этим. Ол гынан баран, ону олоххо киллэрэргэ миэхэ үөрүйэх уонна сатабыл наада этэ. Наадалаах үп боппуруоһа быһаарыллыбытын кэнниттэн, аны, тэрийии боппуруоһа күөрэйэн тахсыбыта. Ол иһин, «Мин биисинэһим» кииҥҥэ уонна Биисинэс-Инкубаторга өйөбүлгэ, көмөҕө наадыйарбын биллэрбитим.

— Үлэҥ туһунан тугу этиэҥий?

— Массыынаны көрүүгэ, өрөмүөннээһиҥҥэ наадыйыы улаатан иһэр. Бүгүҥҥү күҥҥэ биһиги мастарыскыайбытыгар арҕаа киэҥник тарҕаммыт кыра массыыналар өрөмүөннэрэ оҥоһуллар. Массыыналаахтарга уустук боппуруостарын быһаарарга көмөлөһөбүт.

— Маннык хайысханан үлэлиир, дьарыктанар мастарыскыайдар элбэхтэр дии. Куоталаһыыны хайдах тулуктаһаҕыт?

— Итиннэ чопчу хоруйдаахпын: миэхэ конкурент диэн суох, биһиги бары биир сүбэнэн үлэлиибит.

— Илья, оттон социальнай көмө туһунан хайдах билбиккиний?

— Бу туһунан мин СӨ дьоҕус уонна орто предпринимательство Порталыттан билбитим. Информация ылан баран «Мин биисинэһим» киинтэн ыйыталаһан, барытын сиһилии билбитим.

— Көрүллүбүт үпкүн хайдах туһанныҥ?

— Мастарыскыай үлэтин салгыы сайыннарарга анаан профессиональнай аппараат ылбытым.

— Оттон бэйэлэрин дьыалаларын тэриниэн баҕалаахтарга тугу сүбэлиэҥ этэй?

—Бэйэҕит сөбүлүүр дьарыккытыгар ылсыҥ уонна сэргиир, сэҥээрэр хайысхаҕытын сиһилии үөрэтэргэ кыһаллыҥ диэм этэ. Түгэнинэн туһанан, Намҥа «Мин биисинэһим» киин бэрэстэбиитэлигэр Марфа Семеновнаҕа,  Анна Петровнаҕа бэйэ дьыалатын тэринэрбэр ахсаабат кыһамньыларын, улахан көмөлөрүн иһин наһаа махтанабын. Кинилэр олус туһалаах элбэх сүбэни-аманы биэрдилэр диэн бэлиэтиибин.