Кэлиҥҥи кэмҥэ Бартыһаан нэһилиэгин олохтоохторо сыл аайы норуот көҕүлээһинин бырагырааматыгар кыттан, сайдыы тосхолун торумнууллар.
edersaas.ru
Бу кэскиллээх хамсааһын туһунан нэһилиэк баһылыгын солбуйааччы Полина Скрябина маннык кэпсиир:
— Бырагыраама чэрчитинэн ылыммыт сорук туолан, нэһилиэккэ уу ситимэ киирэн, олохтоохтор оҕуруот, сибэкки, араас маһы хото олордор буоллулар. Кулууппут өрөмүөннэнэн, ип-ичигэс сып-сырдык, киһи эрэ сынньанар сиринэн буолла. Быйыл эмиэ бырагыраамабытын олоххо киллэрэн, 4,5 км усталаах тимир остуолбалаах уот ситимин киллэрдибит.
Нэһилиэкпит тулата сырдыы түспүтэ, санааҕа астык!
Бартыһааҥҥа 8 уулусса уотунан сырдык уотунан күлүмүрдээтэ.
2021 сылга аны нэһилиэкпит аҥарыгар уот киллэрэргэ докумуоммутун оҥосто сылдьабыт.
Онон норуот көҕүлээһинин бырагыраамата баар буолуоҕуттан ыла биһиги нэһилиэкпит биллэ тубуста.
Маннык дьоҥҥо олус наадалаах бырагыраама баара олус үчүгэйин дьон сэргээтэ, ылынна.
Елена ПОТОЦКАЯ, «Саха сирэ» хаһыат», edersaas.ru