Маны аах Нацбырайыактар

«Нам» айан суолун үлэтин эрдэ бүтэрэр соруктаахтар

«Нам» айан суолун оҥоруу үлэтэ кыраапыгын иннинэ, балаҕан ыйыгар, түмүктэниэ.

Суол оҥорооччулар «Нам» айан суолугар Жатайга уонна Кангалаас түөлбэтигэр диэри үлэни саҕалаатылар. Былаан быһыытынан суолу быйыл алтынньыга киллэриэхтээхтэр этэ. Ол эрээри, үлэ тэтимнээхтик салҕанан иһэринэн, балаҕан ыйыгар туттарыахтара диэн СӨ Тырааныспар министиэристибэтин пресс-сулууспата иһитиннэрэр.
Үлэни Ил Дархан Айсен Николаев сорудаҕынан СӨ Тырааныспар уонна суох хаһаайыстыбатын миниистирэ Владимир Сивцев бэрэбиэркэлээтэ. Билигин миэстэтигэр 15 киһи үлэлиир, 11 тиэхиньикэ туһаныллар.
Саха сиригэр халлаан сылыйан тутуу үлэтэ-хамнаһа саҕаланна. Билиҥҥи туругунан уот-күөс остуолбаларын атахтара туруоруллаллар. Үлэ сайын үгэнниэ. Бэдэрээччит үлэни балаҕан ыйыгар түмүктүүр былааннаах, — диэн иһитиннэрэр миниистир. Кини манна даҕатан, матырыйаалларга сыана үрдээһинин онтон да атын биричиинэни кытта сибээстээх куттал үлэҕэ суоҕун бэлиэтээтэ. Өрөмүөн үлэтэ 2021 сылтан саҕаламмытын санатан эттэ.
Өрөмүөннэнэр учаастак уопсай тайааһына 7,21 км. Түөрт балаһаланар, аспаалланар. Маны сэргэ хаххалар, светофордар, оптуобус 12 тохтобула оҥоһуллаллар, суол устун сырдатан уоттанар-күөстэнэр, тротуарданар.
Бу «Куттала суох хаачыстыбалаах суоллар» национальнай бырайыагынан ыытыллар. Үбүлээһин кээмэйэ 1,5 млрд солк., ол иһигэр федеральнайтан 685,7 мөл.солк.
Саха сиригэр 2022 сылга уопсайа 500 км айан суолун оҥорор былаан баар. Итинтэн 264 км — «Куттала суох хаачыстыбалаах суоллар» национальнай бырайыагынан. Тустаан Дьокуускай куоракка 35 км суолу өрөмүөннүөхтэрэ, уларытан оҥоруохтара.
0
0
Telegram Whatsapp