Тыа хаһаайыстыбата Уопсастыба

Намҥа тыа хаһаайыстыбатын дьоҕус биэрэпиһигэр үлэлээбит дьону наҕараадалаатылар

Атырдьах ыйын 1- 30 күннэригэр дойду үрдүнэн тыа хаһаайыстыбатын дьоҕус биэрэпиһэ ыытыллыбыта.

Улууска сүөһүнү-сылгыны, сибиинньэни, көтөрү иитиигэ, сиртэн үүнээйини ылыыга идэтийэр АПК тэрилтэлэр, бааһынай хаһаайыстыбалар бары хабыллыбыттара.
Оттон кэтэх ыаллар хаһаайыстыбалары талан ылыы бэрээдэгинэн (выборочная перепись) Таастаах, Салбаҥ, 2-с Хомустаах, Фрунзе, Көбөкөн, Арбын нэһилиэктэртэн ураты нэһилиэктэргэ барыларыгар ыытыллыбыта.
Улууска барыта 1 ый устата 21 биэрэписчит, ону таһынан 2 боломуочуйалаах, 2 инструктор 2 инструкторскай учаастакка таһаарыылаахтык үлэлээтилэр.

Бүгүн, алтынньы 4 күнүгэр, тыа хаһаайыстыбатын биэрэпиһигэр эппиэтинэстээхтик уонна таһаарыылаахтык үлэлээбит биэрэписчиттэри, боломуочунайдары  уонна инструктордары эҕэрдэлээтилэр.
Улуус баһылыгын э.т.Анатолий Павлов биэрэпискэ үлэлээбиттэри эҕэрдэлээтэ, махталын биллэрдэ уонна улуус баһылыга Юрий Слепцов Махтал суруктарын  уонна тыыннаах сибэкки туттарда.
Анатолий Иванович биэрэпис тус сыаллаах бырагыраамалары, тыа хаһаайыстыбатын сайыннарыыга ылынар кэскиллээх былааннары туруорсууга, үбү-харчыны тыырыыга улахан суолталааҕын эттэ.

Ыытыллыбыт биэрэпис 2026 сыллаахха ыытыллыахтаах бүтүн Россиятааҕы тыа хаһаайыстыбатын биэрэпиһигэр бэлэмнэнии курдук барда.
Барыллаан түмүк бу сыл IV кыбаарталыгар, бүтэһиктээх – 2022 сыл бүтэһигэр тахсыа.

«Нам улууһа» МТ пресс-сулууспата

0
0
Telegram @edersaas20