Кулун тутар 17 күнүгэр Нам улууһун Ленскэй нэһилиэгин дьахталларын түмсүүлэрин көҕүлээһининэн, Улуу Кыайыы 75 сылынан уонна Ийэ дойдуга бэриниилээх буолуу сылын чэрчитинэн, Саха сирин дьахталларын Бастакы сийиэстэрэ ыытыллыбыта 95 сылыгар аналлаах «Далекое имя твое …» диэн сэрии огдооболорун туһунан уһуллубут документальнай киинэ сүрэхтэниитэ буолла.
edersaas.ru
Бу тэрээһиҥҥэ улуус дьаһалтатын дьиэ-кэргэҥҥэ, ыччакка отдела (сал. Мария Винокурова) уонна улуустааҕы дьахталлар уопсастыбаннай түмсүүлэрэ (сал. Ирина Находкина) «Эҥсиэли хочотун дэлэгээттэрэ Саха сирин дьахталларын сийиэстэригэр» диэн хайысханан үлэлэрин биллэрдилэр. Ол эбэтэр нэһилиэктэринэн уонна сылларынан арааран, Нам улууһун аатыттан сийиэстэргэ кыттыбыт дэлэгээт-дьахталлар тустарынан матырыйаал хомуйан, өйдөбүнньүк альбом оҥоһуллуутун эстафетата саҕаланна.
— Документальнай киинэҕэ сэрии огдооболоро: Неля Александровна Винокурова, Елена Леонидовна Михайлова, Татьяна Митрофановна Федорова, Дария Еремеевна Васильева, Ульяна Александровна Сивцева, Елизавета Петровна Карамзина уһуллубуттара. Кинилэртэн тэрээһиҥҥэ икки ытык кырдьаҕас кэлэн кыттыыны ылла. Киинэҕэ уһуллубут гынан баран, тэрээһиҥҥэ кыайан кэлбэтэх огдооболор ааттарыттан манна кыттыыны ылбыт оҕолоругар, сиэннэригэр улуус баһылыгын социальнай үлэҕэ солбуйааччытыта Мария Игнатьева уонна «Ленскэй нэһилиэгэ» МТ баһылыгын социальнай боппуростарга солбуйааччы Тимофей Охлопков сибэкки дьөрбөтүн уонна бэлэхтэри туттардылар. Дьоро киэһэҕэ сэрии огдооболоругар РФ Бэрэсидьиэнэ Владимир Путин аатыттан Улуу Кыайыы 75 сылынан өйдөбүнньүк мэтээллэр бэрилиннилэр. «Дьүөгэлэр-Подруги» форум Нам улууһунааҕы салаатын салайар Инна Сивцева, улуустааҕы «Арассыыйа ийэлэрэ» түмсүүнү салайар Марианна Рожина бырайыакка дьоһун кылааттарын киллэрбиттэрэ бэлиэтэннэ.
Сэрии огдооболорун туһунан киинэ тахсарыгар дьахталлар интэриэстэринэн түмсүүлэрэ: «Нам-автоледи» (сал. Алена Охлопкова), «Үтүө санаа — эн илиигэр» (сал. Сардана Обутова), «Биисинэс-леди» (сал. Ольга Прядезникова), » «Арассыыйа ийэлэрэ» (сал. Марфа Тарабукина), «Айталы-Куо»(сал. Юлия Жергина), «Дьүөгэлэр — подруги » (сал. Мира Парникова) бука бары биир киһи курдук түмсэн, уопсай сүбэнэн үлэлэбиттэрэ бэлиэтэннэ. Кинилэр үлэлэрин түмүгүнэн бэртээхэй киинэ (оператордар Ньургуяна Романова, Иннокентий Кривошапкин) тахсан, улууспут устуоруйатын кэрэһилээтэ. Нам улууһун дьахталлара кырыктаах сэрии сылларыгар, онтон сэрии кэнниттэн дойдуну урусхаллааһынтан көтөҕөр уустук кэмнэригэр, үлэлэригэр, олохторугар тапталларын көрдөрөр киинэни оҥорон бар дьонноругар бэлэх ууннулар, — диэн кэпсиир СӨ дьахталларын уопсастыбаннай тэрилтэлэрин сойууһун иһинэн үлэлиир Нам улууһунааҕы дьахталлар уопсастыбаннай түмсүүлэрин салайааччы Ирина Находкина.
Бу сыллар тухары Саха сирин дьахталларын сийиэстэригэр Нам улууһун дьахталлара көхтөөхтүк кыттыбыттара. Ол да иһин буоллаҕа, нэһилиэктэртэн кэлбит дьахталлар сэбиэттэрин лиидэрдэрэ дэлэгээт-дьахталлар тустарынан матырыйаал хомуллуутун олус сэргээн ылыннылар. Мантан инньэ көхтөөх үлэ өссө күүскэ ыытыллыаҕын иһитиннэрдилэр. Тэрээһин кэмигэр Саха сирин дьахталларын Бастакы сийиэһигэр Нам улууһуттан сылдьыбыт дэлэгээт Мария Федоровна Охлопкова-Гаврилова туһунан быыстапка улахан болҕомтону тарта.
Кини туһунан матырыйаалы Хатырык нэһилиэгин дьахталларын сэбиэтин салайааччыта Аглаида Макитова хомуйда. Маны таһынан, урукку сыллардаах сийиэстэргэ Хамаҕаттаттан, Хатыҥ Арыыттан, Ленскэй нэһилиэгиттэн, Хатырыктан, 1-кы Хомустаахтан кыттыыларын туһунан дьахталлар сэбиэттэрэ уонна улуустааҕы киин бибилэтиэкэ (сал. Майя Софронова) хомуйан быыстапка оҥордулар. Онон атын нэһилиэктэргэ эмиэ маннык матырыйааллары хомуйарга суол аһылынна.
Ити курдук, Саха сирин дьахталларын бастакы сийиэстэрэ ыытыллыбыта 95 сылыгар аналлаах тэрээһиннэри ыытыыга Нам улууһун дьахталлара өрөспүүбүлүкэ атын улуустарыгар үтүө холобуру көрдөрдүлэр. Мантан саас бары улуустарга бу сыл суолталаах бэлиэ тэрээһинигэр анаммыт үлэлэр биллэ сэргэхсийиэхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ирина Находкина түһэриитэ.