Ааһан эрэр 2019 сыл үөрүүтүн үрдэтэн, Нам улууһун Кириэс Кытыл нэһилиэгэр дьоһун үөрүү тосхойдо.
edersaas.ru.
Владимир Герасимов салайар «Сэргэ» бааһынай хаһаайыстыбата 120 сүөһү турар саҥа комплексын үлэҕэ киллэрдэ.
«Сүөһү ахсаанын элбэтэн, ылыллар бородууксуйаны астаан-үөллээн, дохуот киллэрэр таһымҥа тахсыы үгүс сыллаах утумнаах үлэни эрэйэр. Онно бастакы хардыы быһыытынан олох ирдэбилигэр сөп түбэһэр үлэлиир усулуобуйа тэриллэн, үлэлииргэ-хамсыырга интэриэс үөскүө диэн эрэнэбин, — диэтэ тыа хаһаайыстыбатын миниистирэ Александр Атласов.
Дойду салалтата тыа хаһаайыстыбатын сайыннаран, бэйэ аһынан-үөлүнэн хааччыллыыга ураты улахан болҕомтотун уурар. Ол курдук, министиэристибэ үлэ эбийиэктэрин тутуутун, аныгы тиэхиньикэни, туттар тэрили атыылаһары көҕүлээн, ол ороскуотун сорох чааһын толуйар. Ону таһынан бааһыай хаһаайыстыбалары өйөөһүн бырагырааматынан граннар бааллар. Нам улууһун биир бастакы бааһынайа Владимир Герасимов толору хааччыллыылаах саҥа комплексы тыатын хаhаайыстыбатын министиэристибэтин «Агропромышленнай комплекска инвестиционнай тутуулары көҕүлээһин» хос бырагыраамма чэрчитинэн туттан үлэҕэ киллэрдэ.
Раиса Сибирякова, «Саха сирэ» хаһыат, edersaas.ru