Нам улууһун “1-кы Хомустаах нэһилиэгэ” муниципальнай тэриллии дьаһалтатын, спорт уопсастыбатын сүрүннүүр үлэһиттэрин уонна олохтоох култуура, сынньалаҥ киинин көҕүлээһиннэринэн, тохсунньу 8 күнүгэр 2016 сыл түмүгүнэн бастыҥ спортсменнары, күүс-көмө буолар тэрилтэ салайааччыларын, спонсордары чиэстиир дьоро киэһэ буолан ааста.
Сылы түмүктүүр тэрээһиҥҥэ уон бастыҥ көрдөрүүлээх спортсмен аата ааттанна. Ол курдук, Николай Константинов уонна кини төрөппүт оҕолоро Намыына, Сергей Константиновтар (мас-рестлинг), Антон Тойтонов (хапсаҕай), Сайыына Попова (нуучча дуобата), Дьулустаан Баишев (гиирэ спорда), Рената Тимофеева (сахалыы остуол оонньуута), Айаал Охлопков (көҥүл тустуу), Олеся Слепцова (гиирэ спорда) уонна Денис Соловьев (пауэрлифтиҥҥэ «Азия оҕолорун” призера).
Бу үөрүүлээх киэһэҕэ улууспут аҕа баһылыга Александр Атласов, нэһилиэкпит баһылыга Василий Жирков, биир дойдулаахтарбыт, спорт бэтэрээннэрэ – мас-рестлиҥҥэ Россия сүүмэрдэммит хамаандатын сүрүн тренерэ Николай Константинов, нуучча дуобатыгар сахаттан бастакы гроссмейстер Александр Азаров, саха спордун бэтэрээнэ, СахаВА бочуоттаах маастара Анатолий Софронов, нэһилиэк спордун дьиэтин дириэктэрэ, уһун сиргэ сүүрүүгэ Россия уонна СӨ спордун маастара Семен Охлопков эҕэрдэ истиҥ тылларын этэн, нэһилиэк эдэр ыччаттарыгар уонна биир дойдулаахтарыгар алгыс тылларын тиэртилэр.
Биир үтүө түгэнинэн, спорт федерациятын салайааччыларыгар үөрүүлээх быһыыга-майгыга туоһулуур докумуоннары туттарыы буолла. Ол курдук, нэһилиэкпитигэр аҕыйах сыллааҕыта дьоҕус авиация тэрилтэтэ аһыллан, аэродром оҥоһуллубута. Манан сибээстээн, өрөспүүбүлүкэтээҕи ДОСААФ линиятынан Дьокуускайдааҕы уопсастыбаннай тэрилтэ иһинэн «Покровитель» диэн авиация кулуубун кытта сөбүлэһии түһэрсэн, саҥа федерация тэриллибитин бэлиэтиир тоҕоостоох. Аны саас оҕолортон саҕалаан парашютунан ыстаныы спордун сайыннарыы үлэтэ саҕаланыа.
Анатолий СОФРОНОВ – Онтуон, биһиги уопсастыбаннай кэрэспэдьиэммит.
Нам