Ааспыт 2017 сыл түмүгүнэн, Нам улууһугар сүөһү-сылгы ахсаана элбээбит, тыа хаһаайыстыбатын оҥорон таһаарар үлэтин көрдөрүүтэ тупсарыллыбыт.
Чахчыта даҕаны былырыын улууска улахан үлэ ыытыллыбыт. Элбэх социальнай эбийиэк өрөмүөннэммит, саҥа дьиэлэри үлэҕэ киллэрии былаана туолбут, 43 эдэр ыал олорор дьиэнэн хааччыллыбыт. Ыччат сылын чэрчитинэн, бары нэһилиэктэргэ ыччат десана тэриллибитэ, алта нэһилиэккэ устудьуоннар тутар этэрээттэрэ үлэлээбит. «Мин – баһылыкпын» дьыалабыай оонньуу ыытыллыбыт. «Эдэр аармыйа» диэн Бүтүн Арассыыйатааҕы оҕо байыаннай-партиотическай уопсастыбаннай хамсааһынын салаата тэриллэн үлэтин саҕалаабыт. Ил Дархан Егор Борисов «Саха өрөспүүбүлүкэтигэр гражданнар туспа категорияларын социальнай өттүнэн өйөөһүн туһунан» Ыйааҕын чэрчитинэн, сөбүлэһии түһэрсиллэн, кыра дохуоттаах ыалларга аадырыстаах социальнай көмөнү оҥорор хамыыһыйа тэриллибит. Бу кэм устата 123 ыал эбии төлөбүрү ылбыт, барыта 1 мөл. 882 тыһ. солк. суумалаах харчы бэриллибит, ону таһынан 56 киһи социальнай хантараак түһэрсибит, «Харысхал» муниципальнай бырагыраама чэрчитинэн ыарахан балаһыанньаҕа түбэспит дьоҥҥо көмө оҥоһуллубут. Ил Дархан дьаһалынан, түөрт элбэх оҕолоох ийэҕэ «Ийэ Албан аата» бэлиэ туттарыллыбыт, улууска 2015 сылтан олохтоммут «Нам улууһун Күн күбэй ийэтэ» бэлиэнэн икки ийэ наҕараадаламмыт, Үөдэй дьоһун ыала Ивановтар Бүтүн Арассыыйатааҕы «Тыа сирин ыала» куонкуруска ситиһиилээхтик кыттан кэлбиттэр.
Быйылгы сыл улууска Үлэ уонна дьарыктаах буолуу сылынан биллэриллибит. Онон, оскуолалар идэни туһаайыыга үлэлэригэр, үлэтэ суохтары дьарыктаах оҥорууга, саҥа үлэ миэстэтин таһаарыыга, бизнес-инкубатордары сайыннарыыга бэрт кэскиллээх былааннар ылыллыбыттар.
– Маны таһынан сиртэн үүнээйини ылыыга уонна сүөһү аһылыгын базатын хаҥатыыга туһаайыллыбыт бырагыраманы олоххо киллэриигэ үлэлиэхпит, – диэтэ улуус баһылыга Александр Атласов.
Раиса Сибирякова, Саха сирэ” хаһыат, edersaas.ru.