2022 сылтан Нам улууһун киинигэр 65 куойка-миэстэлээх кырдьаҕастар уонна инбэлииттэр интэринээт-дьиэлэрин тутуута саҕаланыаҕа. Бу туһунан СӨ Үлэтин уонна социальнай сайдыыга министиэристибэтэ иһитиннэрдэ.
«Биһиги федеральнай киинтэн өйөбүлү ыллыбыт. Бу күннэргэ РФ Үлэтин министиэристибэтэ 2021-2023 сс үбү-харчыны тыырыыга, Нам сэлиэнньэтигэр социальнай суолталаах эбийиэк капитальнай тутуутун испииһэккэ киллэрдэ. Бу маны ситиһэргэ биһиги киэҥ далааһыннаах үлэни ыыттыбыт. Нам улууһун дьаһалтата бырайыагын, сметатын докумуоннарын оҥорууга көхтөөхтүк кыттыбыта», — диэн миниистир Елена Волкова иһитиннэрдэ.
Тутуу уопсай суумата 450 мөл. солк. Үлэҕэ 2023 сылга киирэрэ былааннанар.
Билигин «Демография» национальнай бырайыак иитинэн Бүлүү Сосновкатыгар 150 миэстэлээх куорпус тутулла турар. Тутуу эһиил үлэҕэ киириэхтээх.
Маны таһынан быйыл Өлүөхүмэҕэ 200 миэстэлээх кырдьаҕастарга уонна инбэлииттэргэ аналлаах 200 миэстэлээх куорпус тутуута саҕаланна.
edersaas.ru