Бу күннэргэ Намҥа Амма улууһун Соморсун нэһилиэгин «Үрүйэ» тыа хаһаайыстыбатын производственнай кооперативыттан, дуогабар быһыытынан 23 племенной убаһа кэллэ.
Нэһилиэнньэттэн эрдэ сайаапка хомуйан, сылгылары 1 Хомустаахтан саҕалаан Хатырык нэһилиэгэр тиийэ кэтэх хаһаайыстыбалаах ыалларга «Дьиэ кэргэн экономикатын өйүүр» улуус бырагырааматын чэрчитинэн түҥэтилиннэ.
Дьиэ кэргэн экономиката туруктаах буолуутун уонна улууска племенной сылгы элбиирин, хааны тупсарыы сыаллаах сылгылары аҕалан ыалларынан түҥэттилэр.
Чааһынай ыаллар дуогабар быһыытынан сылгылар сыаналарыттан 60 %-нын төлүүллэр. Атын ороскуотун, ол эбэтэр сылгы сыанатын 40%-нын улуус уонна олохтоох дьаһалта уйунналлар.
Сылгылары Амма улууһуттан чааһынай урбаанньыт Василий Игнатьев икки күн устата КамАЗ массыынанан аҕалла. Кинини кытта улуус тыа хаһаайыстыбатын управлениетын специалиһа Дмитрий Рыкунов сырытта.
Сылгылар туруктара үчүгэй.
«Нам улууһа» МТ пресс-сулууспата