Намҥа «Агростартап” куонкуруһугар 19 бааһынай хаһаайыстыба кыттар санаалаах

Тыа сирин дьоно төһө даҕаны үлэлииргэ баҕалаахтарын иһин, үгүстэр куонкуруһу сатаан ааспаттар, эбэтэр куонкуруска хайдах кытталларын билбэттэр.
Бу туһунан Нам  улууһун тыа хаһаайыстыбатын управлениетын начальнигын солбуйааччы Юрий Петровтан кэпсииригэр көрдөстүбүт:— Тыа хаһаайыстыбатыгар урбааны тэрийиигэ интэриэс ордук эдэр дьоҥҥо улаатан эрэр. Эдэр дьон тыа хаһаайыстыбатын курдук ыарахан салааҕа ылсан үлэлиир баҕалааҕа уонна тыа сирин олоҕо сайдарын туһугар дууһатынан «ыалдьара» хайҕаллаах суол. Биһиги управлениебыт улууспутугар тыа хаһаайыстыбатынан дьарыктаныан баҕалаах дьону өйүүр уонна тыа сиригэр олорор дьон үлэлиир-хамсыыр көҕүн күүһүрдэр туһуттан СӨ тыа хаһаайыстыбатын министиэристибэтэ ыытар куонкурустарыгар, бырайыактарыгар кыттыан баҕалаахтары үөрэтиини уонна бары түһүмэҕэр сүбэлиир-үөрэтэр үлэни күүһүрдэр соругу күүскэ туруорунан үлэлиир.
Ол курдук, ааспыт сыл бүтэһик күннэригэр 2021 сылга «Агростартап” куонкуруһар кыттыан баҕалаахтары мунньан сүбэ мунньах ыыппыппыт.
Билиҥҥи туругунан куонкуруска 19 бааһынай хаһаайыстыба кыттар баҕа санаатын биллэрдэ. Ааспыт сыллары кытта тэҥнээн көрөр буоллахха, быйыл бройлер, бараан иитээһинэ курдук саҥа хайысханан дьарыктаныан баҕалаахтар бааллар. Былырыын, 2020 сылга, улуустан 13 киһи куонкуруска толору докумуонун бэлэмнээн кыттыбытыттан, хамыыһыйаны 3 киһи ааһан грант ылбыттара.  Бу куонкуруска тыа хаһаайыстыбатынан дьарыктаныан баҕалаах ким баҕарар кыттыан сөп. Интэриэһиргээбит буоллаххытына нэһилиэккит олохтоох дьаһалтатын тыа хаһаайыстыбатын специалиһын кытта билсэн сүбэ ылыаххытын сөп. Эбэтэр, улуус тыа хаһаайыстыбатын управлениятын 41-2-82 нүөмэригэр эрийэн билсиэххитин сөп.Толоруллар докумуон былааҥкаларын тыа хаһаайыстыбатын министиэристибэтиттэн эбэтэр (https://minsel.sakha.gov.ru) сайтан ылыаххытын, мунаарар ыйытыылардаах буоллаххытына 8-800-100-25-26 диэн нүөмэргэ эрийэн ыйыталаһыаххытын эмиэ сөп, — диэн кэпсээтэ.
Бу куонкурус 2020-2024 сылларга “Тыа хаһаайыстыбатын сайыннарыы уонна бэйэ оҥорон таһаарар бородууксуйатын элбэтии, ырыынакка таһаарыы” РФ уонна СӨ национальнай бырайыак чэрчитинэн ыытыллар.
Киһи бэйэтин кыаҕар эрэнэн, дьиэ кэргэнин дохуотун үрдэтэргэ бигэтик туруннаҕына, таһаарыылаахтык үлэлээтэҕинэ эрэ судаарыстыба көмөтө-өйөбүлэ көдьүүстээх буоларын умнумаҥ.