Нацбырайыактар Сүрүн

Намҥа аҕам саастаах дьон олорор дьиэтин тутуута саҕаланна

Нам улууһугар аҕам саастаах уонна доруобуйаларынан хааччахтаах дьоҥҥо аналлаах дьиэ тутуута саҕаланна. Бүгүн Ил Дархан Айсен Николаев дьиэ бастакы олугун түһэриигэ кыттыыны ылла.

Бу бырайыак “Демография” национальнай бырагырааматынан тутуллар. Былаан быһыытынан, манна 65 киһи олоруохтаах. Ил Дархан Айсен Николаев бэлиэтээбитинэн, аҕам саастаах дьон олорор усулуобуйаларын, кинилэр доруобуйаларын көрүү судаарыстыба биир сүрүн сыала-соруга буолар. Кэлиҥҥи сылларга бу национальнай бырагырааманан Бүлүү улууһун Сосновкатыгар анал диспансер олоххо киирбитэ. Ону таһынан Өлүөхүмэҕэ аҕам саастаах уонна доруобуйаларынан хааччахтаах дьон дьиэлэрэ тутулла турар.

Айсен Николаев этэринэн, бу маннык дьиэлэр тутуллаллара нэһилиэнньэлээх пууннарга аҕам саастаах, доруобуйаларынан хааччахтаах дьон олорор усулуобуйатын тупсарарын таһынан, өссө саҥа үлэ миэстэтин таһаарар. Маны сэргэ анал дьиэ таһыгар доруобуйаны көннөрүнэр былаһаакка, киин балыыһа өссө биир саҥа дьиэтэ тутуллара былааннанар.

Эбийиэк, былаан быһыытынан, 2024 сылга диэри тутуллан бүтүөхтээх. Генеральнай бэдэрээтчитинэн “АЭБ капитал” үлэлиир.

Аграфена КУЗЬМИНА,

Мария ВАСИЛЬЕВА (СИА) хаартыскаҕа түһэриилэрэ.

0
0