Маны аах Уопсастыба

Намҥа «Аҕа күрэҕэ-2021» ыытылынна



Уһулуччулаах государственнай уонна политическэй деятель Илья Егорович Винокуров төрөөбүтэ 125 сылыгар анаммыт «Аҕа күрэҕэ-2021» Нам улууһун Никольскай нэhилиэгэр түмүктэннэ.

Бу күрэх уол оҕону сөпкө иитиигэ, уопсастыбаҕа аҕа оруолун үрдэтэр сыаллаах ыытыллар. Сыл бастыҥ күрэхтэһиитэ үрдүк таһымнаахтык ыытылынна.

Өбүгэ төрүт дьарыктарын сөргүтэн, улууспут нэһилиэктэриттэн аҕыс хамаанда, аҕалар уолаттарын кытта, Малаанньыйа күөлүгэр күөн көрүстүлэр. Тэрээһин үөрүүлээх аһыллыытыгар «Нам улууһа» МТ баһылыга Юрий Иннокентьевич Слепцов, сыллата ыытыллар күрэх аҕа уонна уол оҕо сыһыаннарын бөҕөргөтөр буоларын бэлиэтээтэ уонна уол оҕону сөпкө иитии оруннааҕын уонна наадалааҕын ыйда, кыттааччыларга ситиһиини баҕарда. «Никольскай нэһилиэгэ» МТ баһылыга Алексей Карлович Кривогорницын алгыс сиэрин-туомун толордо.

Күрэх маҥнай бэйэни билиһиннэрииттэн, дьиэ кэргэттэрин ситиһиилэриттэн саҕалаан, талааннарыгар тиийэ толору арыйдылар. Салгыы баҕанаҕа ыттан, ойбон алларан, бэрэбинэни суоран, эрбээн, сааһылаатылар, күн бэрт түргэнник ааста.

Күрэхтэһии түмүгүнэн, саамай элбэх баһыйар баалы хомуйан, быйылгы «Аҕа күрэҕэ – 2021» кыайыылаахтарынан I Хомустаах нэһилиэгиттэн Авксентий Николаевич Соловьев уолунаан Илларионнуун ааттаннылар уонна убаһа сертификатынан наҕараадаланнылар. Иккис миэстэҕэ Үөдэй нэһилиэгиттэн Иннокентий Михайлович уонна Никон Ивановтар буолуллар, сүүрбэ тыһыынчаны ыллыллар. Үһүс бочуоттаах миэстэҕэ Хамаҕатта нэһилиэгиттэн Илья Ильич уолунаан Максимныын таҕыстылар уонна уон тыһыынчанан наҕараадаланнылар. Кыттааччылар бука бары биирдиилээн түһүмэҕинэн сыаналаах бириистэри туттулар.

Маны таһынан, тэрээһиҥҥэ Аҕа түмсүүтэ казаҥҥа толору миин буһаран күндүлээтилэр, сибиэһэй салгыҥҥа буспут эт миинэ ордук минньигэс буолан биэрдэ.

Муҥутуур кыайыылаах хамаанда Соловьевтар дьиэ кэргэн муус устар 8-9 күннэригэр 21-с төгүлүн ыытыллар республикатааҕы «Аҕа күрэҕэ — 2021» күрэххэ улуус чиэһин көмүскүүллэригэр ситиһиини баҕарабыт.

«Нам улууhа» МТ дьиэ кэргэн уонна ыччат политикатын тэрилтэтэ,
“Нам улууһа» МТ пресс-киинэ

 

Хаартыска:

0
0