Бүгүн ситэриилээх былаас отчуота Нам улууһугар саҕаланна. Отчуоту олунньу 11 күнүттэн 13 күнүгэр диэри үс бөлөх ыытыаҕа. Ол курдук, бастакы бөлөҕү СӨ сыана бэлиитикэтин судаарыстыбаннай кэмитиэтин салайааччы Антонина Винокурова, иккис бөлөҕү СӨ култуура уонна духуобунас сайдыытын миниистирэ Юрий Куприянов, үһүс бөлөҕү ыччат миниистирэ Степан Саргыдаев салайаллар.
edersaas.ru, Елена Потоцкая
Бастакы бөлөх Бөтүҥ нэһилиэгэр үлэлээтэ. Бүгүҥҥү туругунан нэһилиэккэ 618 киһи олорор. 18-тан 35-гэр диэри саастаах 200-чэкэ ыччат баар. Онтон 50-ча ыччат үлэтэ суоҕунан ааҕыллар. Ол эрээри олох үлэлээбэт киһи суох: ким эрэ быстах үлэҕэ сылдьар, ким эрэ хаһаайыстыбатын көрөн, күннээҕи килиэбин булунар диэххэ сөп.
Бөтүҥ нэһилиэгин саамай кырдьаҕас олохтооҕо, 1923 с. төрүөх, 9 оҕолоох Дьоруой Ийэ Степанида Суздалова «Хатыҥ Арыы» сопхуоска ньирэй көрөөччүнэн үлэлээбит. Нэһилиэк биир сүрүн киэн туттуута — элбэх өҥөнү оҥорор тэрилтэ. Манна олохтоох дьаһалта, бибилэтиэкэ, кулууп, почта бааллар. Олохтоохтор отчуокка олус көхтөөх кыттыыны ыллылар.
Туруорсар боппуруостарыттан нэһилиэк күннээҕи олоҕо ырылхайдык арыллар. Ол курдук, орто оскуола дириэктэрэ Роман Заровняев саҥа оскуола тутуутун туруоруста.
1954 с. тутуллубут оскуола дьиэтэ эргэрэн, нэһилиэккэ биир тирээн турар боппуруоһунан буолар. Оскуолаҕа билигин 65 оҕону 20 учуутал үөрэтэр. Быйыл 1 оҕо бүтэрэр. Бастакы кылааска 7 оҕо үөрэнэ киирбит. Оҕо төрөөһүнүн ахсаана үрдээн иһэр. 2018 сылга 8 оҕо күн сирин көрбүт. Бөлөх салайааччыта Антонина Винокурова биир улууска сылга хас да оскуоланы тутан олоххо киллэрии кыаллыбатын быһаарда. Ол курдук, бастакынан инвестбырагыраамаҕа Хамаҕатта орто оскуолата турар эбит. Биэнсийэлээх Валентин Захаров уматык сыаната үрдүү турарын бэлиэтээтэ. Ону тэҥэ кини босхо эминэн туһаныы боппуруоһун таарыйда.
Доруобуйа харыстабылын министиэристибэтин бэрэстэбиитэлэ Анастасия Эверстова быһаарбытынан, инбэлииттэр Федеральнай бырагыраамаҕа олоҕуран босхо эминэн хааччыллаллар. Оскуола бибилэтиэкэрэ Мария Уваровская төрөппүт быһыытынан олохтоох ыччаты промышленноска сыһыарыы туһунан ыйытта. Кини оҕото «Сургутнефтегаз» АХ баахтанан эспэдииссийэҕэ үлэлиир эбит. Ийэ оҕото уоппускатыгар кэлэригэр айана төлөнөрүн туруоруста.
Бөлөх салайааччыта Антонина Винокурова бэлиэтээбитинэн, акционернай тэрилтэ үлэһитин уоппускатын төлөбүрүн быһаарыы уустук боппуруос. «Ол эрээри интэриэһинэй этии киирбитинэн, олохтоох ыччаты промышленноска сыһыарыыга бу боппуруоһу үөрэтэн көрүөхпүт», — диэн бэлиэтээтэ. Ити курдук, Бөтүҥ нэһилиэгин олохтоохторо бэрт үгүс боппуруоһу биэрдилэр. Мунньах олус көхтөөхтүк ааста. Дьон ыйытыытын хайысхата сүрүннээн сэрии оҕолоругар чэпчэтии, оскуола оҕотун аһылыгар, нэһилиэк суолун асфаллааһын, ыччат дьарыктаах буолуутун тула буолл. Олохтоохтор бырабыыталыстыба ааспыт сыллааҕы үлэтин биһирииллэрин биллэрдилэр.
Елена ПОТОЦКАЯ, edersaas.ru