Аҕыйах хонуктааҕыта Нам улууһун Бөтүҥ сэлиэнньэтин эдэр пиэрмэригэр Красноярскай кыраайтан сүүс төбө кыһыл-эриэн боруодалаах туҥуй тиҥэһэ кэллэ.
edersaas.ru
Нам улууһун Тыа хаһаайыстыбатыгар управлениета иһитиннэрбитинэн, эдэр пиэрмэр Александр Слепцов хаһаайыстыбатыгар анаан түөрт улахан таһаҕас тиэйэр массыынанан сүүс төбө ынах сүөһү Красноярскай кыраай «Гляденское» тэрилтэтиттэн кэллэ.
Ынахтар аҕыс күн устата айаны бэрткэ тулуйан кэлбиттэр. Улуус бэтэринээрдэрэ ынахтар туруктара үчүгэй диэн бигэргэттилэр. Билигин сүөһүлэр отут күннээх харантыыҥҥа тураллар.
Александр Слепцов хаһаайыстыбатын сэттэ сыллааҕыта «Саҕалааччы пиэрмэр» бырагыраама көмөтүнэн саҕалаабыта. Эдэр пиэрмэр бастаан 25 төбө сылгыны ылбыта, билигин сылгытын ахсаана 140 төбөҕө тиийэ улаатта.
Ону таһынан, Александр хаһаайыстыбатын кэҥэттэн, бу ынах сүөһүнү ылла. Былырыын кэҥэттэр санааттан, эдэр пиэрмэр Тыа хаһаайыстыбатын министиэристибэтин “Дьиэ кэргэн пиэрмэлэрин сайыннарыы” бырагырааматыгар сайаапка биэрбитэ. Куонкурус түмүгүнэн, Александр Слепцов 10,5 мөлүйүөн солкуобайдаах граны ылбыта.
«Былааннаабыппыт курдук, грант харчытыгар кыһыл-эриэн боруода туҥуй тиҥэһэ сүөһүтүн ыллыбыт. Билигин ынахтар Аппааны сэлиэнньэтигэр харантыыҥҥа тураллар. СӨ Тыатын хаһаайыстыбатын министиэристибэтигэр махталбын тиэрдэбин. Көмөтө суох аныгы комплекс туттуо суох этибит, сүөһүбүтүн атыылаһарбытыгар ыарахаттардаах буолуо этэ», — диэн Александр санаатын үллэстэр.
СӨ Тыатын хаһаайыстыбатын пресс-сулууспата.